Եթե՝ հաղորդագրություն չկա՝ կրակոց չկա․ ՊՆ պարզաբանումը

Եթե՝ սահմանային կրակոցների ինտենսիվությունը պահպանված լիներ՝ կլիներ պաշտոնական հաղորդագրություն, եթե չկա հաղորդագրություն՝ չկան ինտենսիվ կրակոցներ։ Այս մասին հայտարարել է պաշտպանության փոխնախարար Արման Սարգսյանը՝ ԱԺ-ում լրագրողների հետ ճեպազրույցի ժամանակ։

Լրագրողի դիտարկմանը, որ դեպքեր են եղել, երբ սահմանին կրակոցներ են եղել, սակայն պաշտպանության նախարարությունը չի հայտնել այդ մասին, Արման Սարգսյանն ասել է, թե այդ ժամանակ օպերատիվության խնդիր է եղել։

«Եղել են դեպքեր, երբ փոքր օպերատիվության խնդիր է եղել, որը վերջին ժամանակաշրջանում  նման խնդիր այլևս չունենք»,- ասել է փոխնախարարը։

Մարտի սկզբից Ադրբեջանի պաշտպանության նախարարությունն ամենօրյա ռեժիմով հայկական կողմին մեղադրում էր հրադադարի խախտման համար։ Հայաստանի պաշտպանության նախարարությունը հերքում էր բոլոր այդ հաղորդագրությունները։

Մարտի 31-ին և ապրիլի 13-ին ՊՆ-ն հաղորդել էր, որ Ադրբեջանի ԶՈՒ ստորաբաժանումները կրակ են բացել Սյունիքի մարզի Խնածախ բնակավայրի ուղղությամբ, ինչի հետևանքով մի դեպքում՝ բնակելի տուն, մյուս դեպքում՝ գյուղի մշակույթի տունն էր վնասվել:

Ըստ ՊՆ հաղորդագրության, ապրիլի 20-ին և 23-ին Ադրբեջանի ԶՈՒ-ն կրակել էր Սյունիքի մարզի Խոզնավար բնակավայրի ուղղությամբ։ Երկու դեպքում էլ մեկական բնակելի տուն էր վնասվել։