Տավուշի մարզում մեկ ամիս առաջ են կրակոցներ եղել․ մարզպետ

Տավուշի մարզում հրադադարի խախտման դեպքեր գրանցվել են մոտ մեկ ամիս առաջ։ Կրակոցները հիմնականում եղել են Բերդ բնակավայրի ուղղությամբ, անկանոն բնույթի և ոչ ուղղորդված որևէ կոնկրետ կետի։ Այս մասին այսօր Ազգային ժողովում լրագրողների հետ զրույցում հայտնել է Տավուշի մարզպետ Հայկ Ղալումյանը։

«Հիմա հանգիստ վիճակ է։ Այս պահին ժողովրդի մոտ անհանգստություն չկա»,- նշել է մարզպետը։

Անդրադառնալով սահմանազատման գործընթացին, մարզպետը նշել է, որ որևէ գործընթաց չկա այս պահին։ 

«Ոչ մի աշխատանք, իմ տեղեկատվությամբ, չի իրականացվում», - ասել է Ղալումյանը։  

Մայիսի 28-ին փոխվարչապետ Մհեր Գրիգորյանը լրագրողներին վստահեցրել էր, որ Հայաստանի և Ադրբեջանի միջև պետական սահմանի սահմանազատման ու սահմանային անվտանգության հարցերով հանձնաժողովի աշխատանքները փակուղում չեն։ Միևնույն ժամանակ Գրիգորյանն ասել էր, որ այս պահին որևէ նորություն չկա և հաջորդ հանդիպման ամսաթվի վերաբերյալ դեռ պայմանավորվածություն ձեռք չի բերվել։

***

Հունվարի 16-ին Հայաստանի և Ադրբեջանի սահմանին տեղի ունեցավ երկու երկրների սահմանազատման և սահմանային անվտանգության հարցերով հանձնաժողովների տասնմեկերորդ հանդիպումը՝ Հայաստանի փոխվարչապետ Մհեր Գրիգորյանի և Ադրբեջանի փոխվարչապետ Շահին Մուստաֆաևի նախագահությամբ:

Հանդիպման ընթացքում կողմերը համաձայնության են եկել սկսել պետական ​​սահմանի սահմանազատման համալիր աշխատանքները հյուսիսային հատվածից՝ Հայաստանի Հանրապետության, Ադրբեջանի Հանրապետության և Վրաստանի սահմանների հատման կետից և այնուհետև հարավային ուղղությամբ՝ հյուսիսից հարավ մինչև Հայաստանի Հանրապետության և Ադրբեջանի Հանրապետության սահմանը Իրանի Իսլամական Հանրապետության հետ:

Ազգային ժողովն էլ 2024-ի հոկտեմբերի 23-ին ընդունեց Հայաստանի և Ադրբեջանի միջև սահմանազատման հանձնաժողովների կանոնակարգը վավերացնելու օրենքի նախագիծը։

Հայաստանի և Ադրբեջանի սահմանազատման հանձնաժողովների համատեղ գործունեության կանոնակարգը ստորագրվել էր 2024-ի օգոստոսի 30-ին: Սեպտեմբերի 5-ին կառավարությունը քննարկել և հաստատել էր կանոնակարգը՝ այն ուղարկելով Սահմանադրական դատարան։ ՍԴ-ն սեպտեմբերի 26-ին կանոնակարգը Սահմանադրությանը համապատասխանող էր ճանաչել: ԱԺ արտաքին հարաբերությունների հանձնաժողովը հոկտեմբերի 21-ին դրական եզրակացություն էր տվել նախագծին և ներկայացրել խորհրդարանի վավերացմանը։