Civilnet
Վճարի դիմաց կրճատ ծառայելու մասին օրինագիծը «ավելի շատ հարցեր է առաջացնում, քան խնդիր է լուծում». հունիսի 13-ին լրագրողների հետ զրույցում ասել է ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով իշխող «Քաղաքացիական պայմանագիր» խմբակցության պատգամավոր Հայկ Սարգսյանի ներկայացրած օրինագծին։
Վճարի դիմաց «բանակից ազատվելու» կամ կարճ ժամկետով ծառայելու նախագիծն այսօր բացասական եզրակացություն է ստացել ԱԺ պաշտպանության և անվտանգությանհարցերի հանձնաժողովի կողմից։
«Այս օրինագիծը զորակոչի խնդիր չի լուծում, ոչ էլ պայմանագրայինի խնդիր է լուծում, սա ավելի շատ հարցեր առաջացնող է»,- ընդգծել է Քոչարյանը՝ հավելելով, որ օր առաջ մենք պետք է ունենանք այնպիսի զինված ուժեր, որոնք կարողանան պաշտպանել ժողովրդին։
Քոչարյանը մատնանշել է Իսրայելի հարձակումն Իրանի դեմ՝ նշելով, որ անհանգիստ աշխարհի բախումները մոտեցել են Հայաստանի հարավային սահմաններին։ Ըստ իշխանական պատգամավորի՝ իր գործընկերը պետք է հետ քաշեր իր ներկայացրած օրինագիծը։
«Իսրայելի կողմից Իրանի հրթիռակոծություններից հետո այս քննարկումը պարոն Հայկ Սարգսյանը պիտի հետ քաշեր, ասեր, որ դրա վախտը չի»,- ասել է Քոչարյանը։
Նրա խոսքով, հանձնաժողովում այսօր օրինագիծն արդեն ստացել է բացասական եզրակացություն, ինչը նշանակում է, որ այն խորհրդի նիստում չի ներկայացվելու։ «Բայց հեղինակը կարող է պնդել, որ նախագիծը դրվի ԱԺ լիագումար նիստում քննարկման և քվեարկության։ Դրանից առաջ, սակայն, ես համոզված եմ, որ այն նորից կքննարկվի խմբակցության ներսում»,- ասել է Քոչարյանը։
Ըստ նրա, օրինագծի քննարկման հարցը դրվել է նաև կուսակցության ներսում, և անգամ պաշտպանության նախարար Սուրեն Պապիկյանը մասնակցել է այդ քննարկմանը։ «Բայց հետո, երբ պարոն Սարգսյանը նախաձեռնեց առանձին հանդիպում կազմակերպել խմբակցության պատգամավորների հետ, որքան ես գիտեմ, միայն մեկ մարդ է գնացել այդ հանդիպմանը»,- նշել է իշխանական պատգամավորը։
Պատմություններ
