Գագիկ Սուրենյանը՝ սունկ կայքերի անփոխարինելի «հերոս»

Բազմահազար հետևորդներ ունեցող ֆեյսբուքյան էջերը տարածում են գրառումներ, որոնցում նշվում է, թե իբր օդերևութաբան Գագիկ Սուրենյանը հայտնել է կտրուկ եղանակային փոփոխությունների մասին։ 

«Հարգելի հայրենակիցներ, լավ լուր ունեմ․ ամառային շորերը հանեք․ Սուրենյանը կանխատեսում է անսպասելի ջերմային ալիք»,- նշված է գրառման մեջ։

Մեկ այլ գրառմամբ էլ Սուրենյանին հետևյալ խոսքերն են վերագրվել. «Համ շոգ, համ էլ․․․ Շտապ տեղեկացեք հայե՜ր․ Սուրենյանը 2 րոպե առաջ հայտնեց․ Սկսվում է նոր»։  

Եղանակային փոփոխության մասին խուճապային գրառումները, սակայն, կեղծ են։ Իրականում «Հիդրոօդերևութաբանության և մոնիթորինգի կենտրոնի» տնօրենի տեղակալ Գագիկ Սուրենյանն այսպիսի հայտարարություններ չի արել։ 

Գրառումներում մեկ բան է ներկայացվում, հոդվածում՝ բոլորովին այլ

Գրառումները տանում են պարբերաբար կեղծ լուրեր տարածող՝ arm.arminfonews[.]ru, h8.arminfonews[.]ru, lureronline[.]ru և այլ կայքեր կամ տելեգրամյան էջեր, որտեղ հրապարակված լուրը կարդալու համար անհրաժեշտ է բաժանորդագրվել ալիքին։ 

Ֆեյսբուքյան գրառումները արված են հայերեն ու օտարալեզու տառերով՝ հավանաբար հետագայում դրանց հայտնաբերումը բարդացնելու նպատակով։ Իսկ կցված հոդվածները ռուսերեն լեզվով են, ինչը ենթադրաբար արվում է ռուսախոս լսարանին թիրախավորելու համար։

Ֆեյսբուքյան էջերով տարածվող՝ շոգի վերաբերյալ գրառմանը կցված հոդվածներից մեկում նշվում է առաջիկա օրերին սպասվող կտրուկ ցրտահարության, մեկ այլ հոդվածում՝ անձրևների ու կարկուտի մասին։ 

Խուճապ տարածող գրառումների իրական նպատակը

«Հիդրոօդերևութաբանության և մոնիթորինգի կենտրոնը» պարբերաբար հրապարակում է առաջիկա շաբաթվա եղանակի կանխատեսումը։ Կենտրոնն առաջիկա շաբաթվա ընթացքում կտրուկ եղանակային փոփոխություններ չի կանխատեսել։

Գագիկ Սուրենյանը ևս ֆեյսբուքյան  իր էջում նման տեղեկություններ չի հրապարակել։ 

Առհասարակ, եղանակի վերաբերյալ կանխատեսումները մեծ հետաքրքրույթուն ունեն հանրության շրջանում։ Իսկ Գագիկ Սուրենյանը սունկ կայքերի թոփ «հերոսներից» է։ 

Ավելի վաղ #CivilNetCheck-ի հետ զրույցում Սուրենյանը ցավով նշել էր, որ շատերը հավատում են նման լուրերին․ հետևորդները պարբերաբար ուղարկում են հղումներ և խնդրում մեկնաբանել դրանք։ Թեև այս երևույթը նրան նույնպես անհանգստացնում է, նա ընդգծել էր, որ պայքարի գործիքները սահմանափակ են, քանի որ նման էջերի թիվը հարյուրավոր է։

Տե՛ս նաև https://civilnet.am/news/970872 

Կեղծ լուրեր տարածելու հիմնական նպատակը կցված կայքերի այցելությունների թիվը մեծացնելն է՝ գովազդից եկամուտ ստանալու նպատակով, իսկ տելեգրամյան էջերի դեպքում՝ հետևորդների թիվը մեծացնելը։ Այս նպատակին հասնելու համար հաճախ օգտագործվում են «շտապ», «սկսվում է», «հենց հիմա» և նմանատիպ այլ ձևակերպումներ՝ ստիպելու համար ընթերցողին անցնել հղումով։