Ֆիրդուսի թաղամասի դեռևս չօտարված վերջին տան՝ Հանրապետության նրբանցք 8Ա հասցեի սեփականատերերը մինչ օրս համաձայնության չեն եկել կառուցապատողի հետ։ Նրանք ունեն շուրջ 1,000 քմ տարածք՝ շինություններով։ Սեփականատերերն այս տարածքում նաև ձեռնարկատիրական գործունեություն են ծավալում։ Ցանկանում են փոխհատուցում բիզնես տարածքի և բնակարանի տեսքով։
Նրանք ասում են, որ թեև կառուցապատողը «Սիթի սենթրն» է, սակայն բանակցությունները վարում է «Էլիտ Գրուպ» ընկերության հիմնադիր նախագահ Արմեն Մկոյանը։ Այս տունը թերակղզու նման մնացել է թաղամասի հենց կենտրոնում․ այն Խանջյան փողոցին միացնում է միայն մեկ վտանգավոր ճանապարհ։
ՍիվիլՆեթը փորձեց նաև մեկնաբանություն ստանալ «Էլիտ Գրուպ» ընկերության հիմնադիր նախագահ Արմեն Մկոյանից։ Ընկերությունից խոստացան կապ հաստատել, սակայն այդպես էլ մեկնաբանություն չտվեցին։
