Կեղծ մրցույթ, իրական վտանգ․ «Երևան Սիթիի» անունից կեղծ գրառումներ են տարածվում

Սոցիալական ցանցերում տարածվում են գրառումներ «Երևան Սիթի» սուպերմարկետների ցանցի անունից, որոնցում պնդվում է, թե ընկերությունը լվացքի մեքենաներ է խաղարկում։ Խաղարկության պայմանները չափազանց պարզ են․ օգտատիրոջից պահանջվում է պարզապես ընտրել նկարում պատկերված համարներից մեկը, որոնցում իբր թաքնված են նվերներ և մրցանակներ։  

«Ընտրեք 1-ից 12 համարը ներքևում։ Ներսում կա 8 անակնկալ։ Մնացել է 130 հաղթող»,- նշված է Yerevan City Fans ֆեյսբուքյան էջի գրառման մեջ։

Սակայն այս «մրցույթները» կեղծ են։ Դրանց հիմնական նպատակը օգտատերերի անձնական և բանկային տվյալները կորզելն է։

Ինչպես է գործում կեղծ մրցույթի սխեման

Գրառումը տարածող Yerevan City Fans ֆեյսբուքյան էջն ունի ընդամենը 158 հետևորդ, սակայն էջի հրապարակումները հարյուրավոր տարածումներ (share) են ստանում։ Էջում տեղադրված գրառումները բացառապես վերաբերում են մրցույթներին և խաղարկություններին։

Հրապարակումներից մեկում առաջարկվում է գտնել նկարում պատկերված «ճիշտ» ծրարը, որի դեպքում, ըստ գրառման, կարելի է շահել սառնարաններ, հեռուստացույցներ և այլ կենցաղային տեխնիկա։ Մեկ այլ գրառմամբ էլ նշվում է, որ «հաջողակ» թիվը գտնելու դեպքում օգտատերը կարող է մեքենա շահել։

Հատկանշական է, որ գրեթե բոլոր հրապարակումներում օգտագործվում է @pengikut բառը, որը ինդոնեզերեն բառ է, այն համարժեք է անգլերեն @everyone-ին:

«Երևան Սիթի» սուպերմարկետների ցանցի պաշտոնական ֆեյսբուքյան էջում և www.yerevan-city.am կայքում որևէ հղում չկա վերոնշյալ Yerevan City Fans էջին կամ դրա նախաձեռնած միջոցառումներին։ Ավելին, սուպերմարկետների ցանցը իր պաշտոնական ֆեյսբուքյան էջում պարբերաբար զգուշացնում է կեղծ էջերի և կեղծ մրցույթների մասին։

#CivilNetCheck-ը պարբերաբար անդրադառնում է տարբեր սուպերմարկետների անունից՝ այդ թվում «Երևան Սիթիի» անունից տարածվող կեղծ գրառումներրին։ 

Զեղծարարները, որպես կանոն, գործում են հստակ մշակված սխեմայով։ Սկզբում ֆեյսբուքում տարածում են խաղարկությունների վերաբերյալ գրառումներ։ Այնուհետև մեկնաբանություն թողած օգտատերերին ուղարկվում են անձնական հաղորդագրություններ, որոնք պարունակում են ֆիշինգային կայքերի հղումներ։

Այդ կայքերը արտաքին տեսքով կարող են նմանակել սուպերմարկետի պաշտոնական կայքին։ Գրանցվելու կամ «նվերը ստանալու» պատրվակով զեղծարարները պահանջում են մուտքագրել անձնական տվյալներ և բանկային քարտի մանրամասներ։ Որոշ դեպքերում հղումները կարող են պարունակել նաև վնասակար ծրագրեր, որոնք վարակում են օգտատիրոջ սարքը և գողանում գաղտնաբառեր։

Այսպիսով, Yerevan City Fans ֆեյսբուքյան էջի անունից տարածվող գրառումները մրցույթների և խաղարկությունների վերաբերյալ, կեղծ են։ Իսկ սուպերմարկետի անունն օգտագործվում է վստահություն շահելու համար։