Հրազդանի կիրճը հատուկ պահպանվող տարածքի կարգավիճակ կստանա։ Կառավարության որոշմամբ 172 մլն դրամ կհատկացվի Երևանի քաղաքապետարանին՝ Հրազդանի կիրճում հանգստի գոտու կառուցման նպատակով։
Տարածքային կառավարման և ենթակառուցվածքների նախարար Դավիթ Խուդաթյանն ապրիլի 9-ին կառավարության նիստի ժամանակ ներկայացնելով բյուջետային վերաբաշխման նախագիծը, նշել է, որ սա կարևոր քայլ է կիրճի ենթակառուցվածքների զարգացման ուղղությամբ։
Քաղաքապետ Տիգրան Ավինյանը մանրամասնել է, որ ծրագիրն իրականացվելու է Արաբկիր վարչական շրջանի տարածքում և ներառելու է նոր լանդշաֆտային ու ճարտարապետական լուծումներ, այդ թվում՝ սպորտային հարթակներ ու կինոդիտման վայր։ Քաղաքապետի խոսքով՝ կիրճի վերակազմավորման կոնցեպտի շրջանակում իրականացվել է ֆլորայի և ֆաունայի խորը վերլուծություն, իսկ վերջնական նպատակը տարածքին հատուկ կարգավիճակ շնորհելն է։
Վարչապետ Նիկոլ Փաշինյանն իր հերթին շեշտել է, որ սա մայրաքաղաքում իրականացվող բնապահպանական երեք խոշոր ծրագրերից մեկն է՝ Դալմայի այգիների և Նոր Մարաշի անտառ-պուրակների ստեղծման կողքին։ Կառավարության ղեկավարի համոզմամբ՝ քանի որ կիրճն արդեն իսկ ակտիվորեն օգտագործվում է քաղաքացիների կողմից սպորտի և ժամանցի համար, պետության խնդիրն է այդ միջավայրը դարձնել առավել հարմարավետ։
«Այս հատվածով մենք կարող ենք արձանագրել, որ առնվազն Հրազդանի կիրճի մասով սկսում ենք նախագծի իրականացումը: Այստեղ կարևոր է նաև այն, որ տվյալ հատվածն արդեն ապրում է որպես այդպիսին: Հատկապես շաբաթ-կիրակի օրերին, նաև աշխատանքային օրերին մարզվող, վազքով, քայլով զբաղվող, հեծանիվով զբաղվող, ձկնորսությամբ զբաղվող մեր քաղաքացիները հիմնականում կենտրոնանում են այդտեղ։ Հիմա մեր խնդիրը այդ ժամանցը ավելի հարմարավետ դարձնելն է»,- նշել է Նիկոլ Փաշինյանը։
Պատմություններ
