Երևանի քաղաքապետարանն ուղեվարձի վճարումները վերահսկող հսկիչներ է փնտրում

Երևանի քաղաքապետարանի հասարակական կարգի պահպանության ծառայությունը հայտարարել է թափուր հաստիքների համալրման մասին՝ հանրային տրանսպորտում ուղեվարձի վճարումները վերահսկելու նպատակով։ 

««Վարչական իրավախախտումների վերաբերյալ» օրենսգրքում կատարված փոփոխությունների շրջանակում իրականացնելու են ստուգայցեր հանրային տրանսպորտում՝ վերահսկելով ուղեվարձի վճարումներըլ»,- ասված է քաղաքապետարանի հայտարարության մեջ։

Տրանսպորտում վերահսկողության խստացման թեման քննարկվել էր ապրիլի 6-ին կայացած գործակարգավարական նիստի ժամանակ։  Քաղաքապետ Տիգրան Ավինյանը հրահանգել էր վարորդներին՝ մասնակցել ուղեվարձի հավաքագրմանը։

«Չի կարող լինել մի իրավիճակ, երբ մենք մեր բոլոր աշխատակիցներին, մեր բոլոր վարորդներին նորմալ վճարում ենք բոլոր արտաժամյաներով, և իրենք որևէ կերպ որևէ պրոցեսին չեն մասնակցում, մասնավորապես, հավաքագրման պրոցեսին չեն աջակցում»,- ասել էր Ավինյանը:

Քաղաքապետի այս հանձնարարականից հետո մայրաքաղաքի հանրային տրանսպորտում լարվածությունն էականորեն աճել է։ Գրեթե ամեն կանգառում վարորդների և ուղևորների միջև վեճեր են բռնկվում։ Վարորդները ուշ են բացում հետևի դռները, որպեսզի ուղևորները բարձրանան դիմացի դռնով և վճարեն ուղեվարձը։ Սա առաջացնում է իջնող ուղևորների դժգոհությունը, ինչը հաճախ վերածվում է բղավոցների և հայհոյանքների։ Քաղաքային խցանումների պայմաններում ստեղծված իրավիճակն էլ ավելի է լարում մթնոլորտը տրանսպորտում։