Սուրբ Աննա եկեղեցու միջադեպի գործով 2 ամսով կալանավորված 18-ամյա Դավիթ Մինասյանն ազատ է արձակվել։ Այս մասին ֆեյսբուքյան էջում հայտնել է փաստաբան Լուսինե Մարտիրոսյանը:
Դավիթ Մինասյանը կալանավորվել էր ապրիլի 1-ին։ Նա մեղադրվում է պաշտոնատար անձի օրինական ծառայողական կամ քաղաքական գործունեությանը միջամտելու մեջ։
Գլխավոր դատախազությունից հայտնել են, որ դատարանի կողմից ընտրված կալանք խափանման միջոցն ապրիլի 15-ին վերացվել է, կիրառվել է բացակայելու արգելք:
«Դատախազը վարույթն իրականացնող մարմնից՝ Քննչական կոմիտեից, ստացել է քրեական վարույթը՝ մեղադրական եզրակացությունը հաստատելու և դատարան հանձնելու նպատակով: Հսկող դատախազի որոշմամբ դատարանի կողմից ընտրված կալանք խափանման միջոցն այսօր վերացվել է, կիրառվել է բացակայելու արգելք: Դատախազը քրեական վարույթի նյութերը՝ հաստատված մեղադրական եզրակացությամբ, այսօր հանձնել է իրավասու դատարան», - հայտնել են Գլխավոր դատախազությունից:
Դավիթ Մինասյանն առողջական խնդիրներ ունի։ Նա գտնվում էր «Արմավիր» քրեակատարողական հիմնարկում։
Մարտի 29-ին վարչապետ Նիկոլ Փաշինյանը մասնակցել է Սուրբ Աննա Եկեղեցում պատարագի, որին բազմաթիվ հավատացյալներ էին մասնակցում։ Վարչապետն անվտանգության աշխատակիցների ուղեկցությամբ փորձել է դուրս գալ եկեղեցուց, երբ մի երիտասարդ վրդովվել է՝ հորդորելով չհրել իրեն:
«Տենց չնայես ինձ»,- ասել է երիտասարդը, հետո փորձել ձեռքով հարվածել վարչապետին: Փաշինյանը անվտանգության աշխատակիցներին հորդորել է չարձագանքել։ Դեպքից հետո երկու քաղաքացի բերման էր ենթարկվել։
Պատմություններ
