ԱՄՆ-ից բարձրագույն մակարդակով ստացել ենք հավաստիացում, որ TRIPP-ի հետ կապված գործողությունները ոչ միայն չեն դանդաղել, այլև՝ արագացել են։ Այս մասին հայտնել է վարչապետ Նիկոլ Փաշինյանը՝ ապրիլի 15-ին ԱԺ կառավարություն հարցուպատասխանի ժամանակ։
Վարչապետի խոսքով՝ Հայաստանն ու ԱՄՆ-ն ցանկություն ունեն հնարավոր ամենասեղմ ժամկետներում իրականացնել TRIPP նախագիծը։
«Նախորդ օրերին մենք քննարկել ենք էլեկտահաղորդման գծերի շինարարությունը նախատեսվածից շուտ իրականացնելու հնարավորությունը։ Քանի որ պրոցեսը հասունացած է, հասունանում է Հայաստանի և ԱՄՆ-ի մոտեցումը ծրագրի նկատմամբ որպես բացարձակ առաջնահերթություն։ Ուրախ եմ արձանագրել նաև, որ ծրագրերի հետ կապված նույնպիսի շահագրգռվածություն ունի նաև Ադրբեջանը» ,- ասել է վարչապետը։
Փաշինյանը հավաստիացրել է, որ նախագծի շուրջ գործնականում ամենօրյա աշխատանք է իրականացվում։
«Չկա որևէ աշխատանքային օր, որ ես TRIPP-ի հետ կապված որևէ թեմայի չառնչվեմ, որևէ հանձնարարական չտամ»,- ասել է վարչապետը։
Վարչապետը հայտարարել է, որ մտավախություններ կային՝ ԱՄՆ-ի համար TRIPP-ի առաջնահերթություն լինելու հետ կապված, սակայն այդ մտավախություններն այլևս չկան։
Մարտի 12-ին վարչապետ Նիկոլ Փաշինյանը հայտարարել էր, որ Իրանի շուրջ կատարվող իրադարձությունների ֆոնին ակնհայտ է, որ ԱՄՆ վարչակազմի համար TRIPP նախագիծն այս պահին առաջնահերթությունների մեջ չէ։
«Տեսնում եք` ինչ է կատարվում ու ինչով են իրենք հիմա զբաղված։ Ցավոք, հավանականությունը մեծ է, որ պրոցեսների վրա ժամանակի առումով կազդի։ Հիմա ԱՄՆ կառավարությունը կենտրոնացած է այլ խնդրի վրա, իհարկե, եթե պարզվի, որ չի ազդի, ավելի լավ»,- ասել էր Փաշինյանը
Պատմություններ
