ԱՄՆ-ում ՀՀ դեսպանը և MITRE-ի փոխնախագահը քննարկել են TRIPP նախաձեռնությունը

ԱՄՆ-ու Հայաստանի դեսպան Նարեկ Մկրտչյանը MITRE կազմակերպության ներքին անվտանգության ապահովման կենտրոնի (Center for Securing Homeland) փոխնախագահ և տնօրեն Յոսրի Բարսումի հետ քննարկել է TRIPP նախաձեռնության տարածաշրջանային նշանակության հարցը։ Այս մասին հայտնում են ԱՄՆ-ում ՀՀ դեսպանությունից:

Քննարկվել են մի շարք հարցեր՝ ՀՀ–ԱՄՆ օրակարգի, TRIPP նախաձեռնության տարածաշրջանային նշանակության, դրա իրականացման գործընթացի, ինչպես նաև ԱԲ-ի և կիսահաղորդիչների ոլորտում նորարարական գործընկերության մասին փոխըմբռման հուշագրի վերաբերյալ։

Դիտարկվել են կիբերանվտանգության և կրիտիկական ենթակառուցվածքների պաշտպանության ոլորտներում համագործակցության ընդլայնման հնարավորությունները։

MITRE-ը ամերիկյան շահույթ չհետապնդող կազմակերպություն է, որը հանդես է գալիս որպես անկախ և օբյեկտիվ խորհրդատու՝ կապող օղակ հանդիսանալով կառավարության, մասնավոր հատվածի և ակադեմիական շրջանակների միջև: Ավելի քան 65 տարվա պատմություն ունեցող այս հաստատությունը ներկայումս կառավարում է ԱՄՆ դաշնային ֆինանսավորմամբ գործող 42 հետազոտական և զարգացման կենտրոններից (FFRDC) վեցը:

MITRE-ի հիմնական առաքելությունն է տրամադրել տվյալահեն և միջդիսցիպլինար լուծումներ՝ ազգային անվտանգությանը և համապետական բարեկեցությանը սպառնացող բարդ մարտահրավերները հաղթահարելու համար։ Կազմակերպությունը նորարարական լուծումներ է տրամադրում այնպիսի տեխնոլոգիական ոլորտներում, ինչպիսիք են ռադարային համակարգեր և GPS, կիբեռանվտանգություն, ավիացիոն բախումների կանխարգելման համակարգեր, արհեստական բանականություն և ինքնավար կառավարման համակարգեր և քաղցկեղի հետազոտություններ և սինթետիկ կենսաբանություն: