Վերահսկողական մեխանիզմների խստացման արդյունքում հանրային տրանսպորտի օրական հավաքագրումները 37 մլն դրամից հասել են շուրջ 65 մլն դրամի՝ արձանագրելով եկամուտների գրեթե կրկնակի աճ։ Այս մասին ապրիլի 18-ին լրագրողներին հայտնել է Երևանի քաղաքապետ Տիգրան Ավինյանը:
Քաղաքապետի խոսքով՝ նախկինում քաղաքային իշխանությունները որոշակի հանդուրժողականություն էին ցուցաբերում առկա խնդիրների նկատմամբ, քանի որ համակարգը նոր էր ներդրված և կային տեխնիկական հարցեր։ Ավինյանը փաստել է, որ եկել է վերահսկողական մեխանիզմների միջոցով հավաքագրումներն իրականացնելու ժամանակը, և այժմ այդ պրոցեսն ընթացքի մեջ է։
«Ուզում եմ շնորհակալություն հայտնել այն մարդկանց, ովքեր որ չվճարողից դարձել են վճարող, որովհետև դա էլ շատ կարևոր քայլ է և իրականում մեր գիտակցության մեջ շատ բան կարծում եմ պետք է փոխվի»,- նշել է քաղաքապետը։
Ավինյանը հայտնել է, որ շուտով Երևան կհասնեն 45 նոր տրոլեյբուսներ։ Բացի այդ, արդեն հայտարարվել է 170 նոր ավտոբուսների ձեռքբերման մրցույթ, որոնք քաղաքը պատրաստվում է գնել տրանսպորտային բարեփոխումների շարունակականությունն ապահովելու համար։
Ամփոփելով վերջին երկու շաբաթվա աշխատանքը՝ քաղաքապետը արձանագրել է, որ եկամուտների ներհոսքի նման աճը մեծ արդյունք է։ Նա շնորհակալություն է հայտնել վարորդներին՝ իրենց պայմանագրային պարտականությունները համբերատար կատարելու համար, ինչպես նաև այն ուղևորներին, ովքեր տրանսպորտի ներսում աջակցում են վարորդներին և օրինական պահանջ ներկայացնում չվճարողների նկատմամբ։
Տրանսպորտում վերահսկողության խստացման թեման քննարկվել էր ապրիլի 6-ին կայացած գործակարգավարական նիստի ժամանակ։ Քաղաքապետ Տիգրան Ավինյանը հրահանգել էր վարորդներին՝ մասնակցել ուղեվարձի հավաքագրմանը։
Քաղաքապետի այս հանձնարարականից հետո մայրաքաղաքի հանրային տրանսպորտում լարվածությունն էականորեն աճել է։ Գրեթե ամեն կանգառում վարորդների և ուղևորների միջև վեճեր են բռնկվում։ Վարորդները ուշ են բացում հետևի դռները, որպեսզի ուղևորները բարձրանան դիմացի դռնով և վճարեն ուղեվարձը։ Սա առաջացնում է իջնող ուղևորների դժգոհությունը, ինչը հաճախ վերածվում է բղավոցների, հայհոյանքների, երբեմն նաև բռնության: Հաճախ ուղևորները հրաժարվում են վճարել ուղեվարձը՝ պատճառաբանելով, որ թանկ է (2025-ից ուղեվարձը դարձել է 150 դրամ, նախկին 100-ի փոխարեն)։
Պատմություններ
