Վենետիկի Դորսոդուրո N2266 հասցեում բացվել է հայ մեծանուն գրող Ավետիք Իսահակյանի մասին պատմող հուշատախտակը: Դա այն հասցեն է, որտեղ ապրել է Իսահակյանը: Այս մասին հայտնում են ԿԳՄՍ նախարարությունից:
Գաղափարն իրականություն է դարձել ԿԳՄՍ և Արտաքին գործերի նախարարությունների համատեղ ջանքերով՝ Իտալիայում ՀՀ դեսպանության աջակցությամբ, Ավետիք Իսահակյանի տուն-թանգարանի և Վենետիկի ՀՀ պատվո հյուպատոսության կազմակերպմամբ:
«Անցնող տարում մի շարք միջոցառումներով հիշատակել ենք մեր մեծագույն բանաստեղծի 150-ամյակը։ ԿԳՄՍ նախարարությունն իրականացրել է հոբելյանական բազմաթիվ միջոցառումներ՝ Հայաստանում և արտերկրում՝ արժևորելով Իսահակյանի գրական ու մշակութային ժառանգությունը։ Անցած տարի մարտին Գերմանիայի Լայպցիգ քաղաքում ևս տեղադրել ենք հուշատախտակ՝ ի հիշատակ գրողի»,- ասել է ԿԳՄՍ նախարարի տեղակալ Ալֆրեդ Քոչարյանը:
Վարպետի մասին պատմող հուշատախտակը խորհրդանշում է երկու երկրների միջև մշակութային երկխոսությունը։ Հուշատախտակի վրա ուրվագծվում է Ռիալտոյի կամուրջը, որն Իսահակյանի լավագույն բանաստեղծություններից մեկի՝ «Մի մրահոն աղջիկ տեսա Ռիալտոյի կամուրջին․․․», խորհրդանիշն է և Վարպետի սիրելի ճարտարապետական կառույցներից մեկի՝ Երերույքի տաճարի զարդանախշը։ Հուշատախտակի վրա եղած QR կոդով այցելուները կարող են տեսնել «Իսահակյանը և Վենետիկը» տեսանյութը։ Հուշատախտակի ճարտարապետը Հայկ Ասատրյանն է։
Պատմություններ
