Անթալիայի դիվանագիտական ֆորումի շրջանակներում ՀՀ ԱԳ նախարարի տեղակալ Վահան Կոստանյանը մասնակցել է «Հարավային Կովկաս. ձևավորվող ռազմավարական հանգույց» խորագրով պանելային քննարկաման: Հայտնում են ԱԳՆ-ից։
Պանելային քննարկման մյուս մասնակիցներն էին Ադրբեջանի նախագահի արտաքին քաղաքական հարցերով օգնական Հիքմեթ Հաջիևը, Վրաստանի կառավարության աշխատակազմի ղեկավար Լևան Ժորժոլիանին և Թուրքիայի նախագահի արտաքին քաղաքականության և անվտանգության հարցերով գլխավոր խորհրդական Ակիֆ Քըլըչը:
Կոստանյանը անդրադառնալով խաղաղության գործընթացին՝ նշել է, որ այն պահանջում է շարունակական քաղաքական որոշումներ, մասնավորապես՝ հաղորդակցությունների բացման ուղղությամբ։ Նրա խոսքով՝ դա կարող է նպաստել տարածաշրջանի երկրների միջև փոխկապակցվածության խորացմանը և Հարավային Կովկասը դարձնել կամուրջ Եվրոպայի, Կենտրոնական Ասիայի և Հեռավոր Արևելքի միջև։
«Այժմ մենք այստեղ ենք՝ քննարկելու ընդհանուր ապագայի հնարավորությունները, համագործակցությունը և ունենալու իրական երկխոսություն։ Եվ սա շատ խորհրդանշական է, որ նույն տարածաշրջանից չորս ներկայացուցիչներ միասին նստած քննարկում են համագործակցությունն ու այն ապագան, որը միասին են պատկերացնում»,- ասել է Կոստանյանը։
Կոստանյանը նշել է, որ Հայաստանը ձգտում է դիվերսիֆիկացնել էներգամատակարարումը և դառնալ տարանցիկ հանգույց՝ Կենտրոնական Ասիայից և Ադրբեջանից դեպի Եվրոպա ուղղվող էներգակիրների համար։
Անդրադառնալով եվրոպական ուղղությանը՝ ՀՀ ԱԳ նախարարի տեղակալը ասել է, որ Հայաստանի համար Եվրոպական միության հետ համագործակցությունը ոչ միայն տնտեսական, այլև արժեքային ընտրություն է։ Նա հիշեցրել է, որ Հայաստանը ընդունել է ԵՄ անդամակցության գործընթացը սկսելու վերաբերյալ օրենք և աշխատում է աստիճանական ինտեգրման ուղղությամբ։
Պատմություններ
