Պենտագոնի ներքին նամակում քննարկվել է Իսպանիային ՆԱՏՕ-ից հեռացնելու տարբերակը. Reuters

Պենտագոնի ներքին էլեկտրոնային նամակում ներկայացվել են այն տարբերակները, որոնցով Միացյալ Նահանգները կարող է պատժել ՆԱՏՕ-ի այն դաշնակիցներին, որոնք, Վաշինգտոնի գնահատմամբ, բավարար աջակցություն չեն ցուցաբերել Իրանի դեմ պատերազմի ընթացքում։ Այդ տարբերակների թվում եղել է նաև Իսպանիայի անդամակցության կասեցումը դաշինքում, Reuters-ին հայտնել է ամերիկացի անանուն պաշտոնյան։

Աղբյուրի խոսքով՝ փաստաթուղթը շրջանառվել է Պենտագոնի բարձր մակարդակներում և արտահայտել է դժգոհություն այն երկրների նկատմամբ, որոնք ԱՄՆ-ին բազավորման, օդային տարածքի օգտագործման կամ տարանցման իրավունքներ չեն տրամադրել։ Նամակում նշվել է, որ նման աջակցությունը ՆԱՏՕ-ի անդամների համար «նվազագույն պարտավորություն» է։

Պաշտոնյայի խոսքով՝ տարբերակներից մեկը նախատեսել է «դժվար» երկրներին հեռացնել ՆԱՏՕ-ի կարևոր կամ հեղինակավոր պաշտոններից։ Reuters-ի աղբյուրը նշել է, որ փաստաթուղթը չի առաջարկել ԱՄՆ-ի դուրս գալը ՆԱՏՕ-ից և չի ներառել Եվրոպայում ամերիկյան բազաների փակման հարցը։

Reuters-ը գրում է, որ ԱՄՆ նախագահ Դոնալդ Թրամփը նախկինում կոշտ քննադատել է եվրոպական դաշնակիցներին՝ Իրանի հետ հակամարտության ընթացքում բավարար աջակցություն չցուցաբերելու համար և հայտարարել, որ դիտարկում է ՆԱՏՕ-ից ԱՄՆ-ի դուրս գալու հնարավորությունը։

Իսպանիայի վարչապետ Պեդրո Սանչեսը, մեկնաբանելով հրապարակումը, ասել է, որ Մադրիդը առաջնորդվում է պաշտոնական փաստաթղթերով և Միացյալ Նահանգների պաշտոնական դիրքորոշմամբ։