Բեռնափոխադրում իրականացնող ՀՀ քաղաքացի վարորդներն այսուհետ իրավունք կունենան ՌԴ տարածքում գտնվել մինչև 180 օր՝ մեկ օրացուցային տարվա ընթացքում: Համապատասխան որոշումը հրապարակել է Ռուսաստանի Դաշնության կառավարությունը։
2026-ի ապրիլի 27-ին ընդունված որոշման համաձայն՝ փոփոխությունները վերաբերում են Անկախ Պետությունների Համագործակցության (ԱՊՀ) անդամ պետությունների, ինչպես նաև Վրաստանի այն քաղաքացիներին, որոնք հանդիսանում են միջազգային ավտոմոբիլային փոխադրումներ իրականացնող պրոֆեսիոնալ վարորդներ:
Համապատասխան որոշումն իր ֆեյսբուքյան էջում հրապարակել է Հայաստանի էկոնոմիկայի նախարար Գևորգ Պապոյանը և գրել․
«Վարորդների հարցն էլ լուծվեց»։
2025-ի հունվարի 1-ից ուժի մեջ մտած Ռուսաստանի Դաշնության օրենսդրական փոփոխություններով ոչ վիզային ռեժիմի երկրների քաղաքացիները, որոնք Ռուսաստանի Դաշնություն մուտք էին գործում ոչ աշխատելու նպատակով, այսինքն՝ միգրացիոն քարտում այցի նպատակը բաժնում աշխատանք չէին նշում, նրանք նախորդ տարվա յուրաքանչյուր 180 օրվա մեջ 90 օր գտնվելու փոխարեն օրացուցային տարվա ընթացքում կարող էին գտնվել գումարային 90 օր: Այսինքն՝ երկու անգամ ժամկետը կրճատվել էր՝ համաձայն այս փոփոխության, ինչը վերաբերվում էր նաև ուղևորա և բեռնափոխադրում իրականացնողներին։
Որոշումը, որը ստորագրել է ՌԴ վարչապետ Միխայիլ Միշուստինը և ուժի մեջ կմտնի 2026-ի հունիսի 30-ից, հստակեցնում է, որ այս արտոնությունից օգտվելու համար պարտադիր պայման է, որպեսզի այդ օտարերկրյա քաղաքացիները սահմանված կարգով դիմում ներկայացնեն՝ ՌԴ մուտք գործելու և ՌԴ-ում գտնվելու (բնակվելու) նպատակով։
Պատմություններ
