Հոկտեմբերի 25-ին կայանալիք ՏԻՄ ընտրությունների ընդառաջ «Անկախ դիտորդ» դաշինքը մտահոգություն է հայտնել թեկնածուների ձերբակալությունների և իրավապահ մարմինների գործողությունների թափանցիկության պակասի կապակցությամբ։
Դիտորդական դաշինքը նշում է, որ դեռևս կուսակցությունների առաջադրման և քարոզարշավի սկզբնական փուլերում իրավապահների որոշ գործողություններ, որոնք անմիջականորեն կապված չեն եղել ընտրական գործընթացների հետ, ընկալվել են որպես ընդդիմադիր թեկնածուների նկատմամբ անուղղակի ճնշում։
Միաժամանակ, դաշինքը դատապարտել է ընտրակաշառքի, ընտրական հիմնադրամից դուրս քարոզչական ծախսերի և կոռուպցիոն պայմանավորվածությունների ցանկացած փորձ՝ անկախ քաղաքական ուժից։
«Անհրաժեշտ է ապահովել հաշվետվողական և թափանցիկ այնպիսի իրավական գործընթաց, որը չի թողնի քաղաքական հետապնդման կամ ընտրություններում միջամտության տպավորություն»,- ասվում է հայտարարությունում։
«Անկախ դիտորդի» գնահատմամբ՝ նույնիսկ հիմնավորված քրեական հետապնդումը, եթե իրականացվում է առանց բավարար թափանցիկության, կարող է բացասաբար ազդել ընտրողների և թեկնածուների վրա՝ խոչընդոտելով քաղաքական գործընթացները։
Հոկտեմբերի 25-ին Հայաստանի 21 համայնքում տեղի կունենան ՏԻՄ ընտրություններ։
Հակակոռուպցիոն կոմիտեից հոկտեմբերի 24-ին հայտնել են, որ Հայաստանի մի շարք համայնքներում ընտրական բնույթի կոռուպցիոն հանցագործությունների վերաբերյալ քրեական վարույթներով իրականացվում են քննչական գործողություններ։ Կան ձերբակալվածներ։
Հոկտեմբերի 24-ի առավոտյան Արթիկում բերման են ենթարկվել «Ապրելու երկիր» կուսակցության համայնքապետի թեկնածու Արթուր Աստոյանը և նրա մի շարք թիմակիցներ։ Նույն օրը՝ «Հայրենիք» կուսակցության համայնքապետի թեկնածու Լևոն Վահրադյանն էլ «Ազատության» հետ զրույցում հաստատել է, որ իրենց թիմակիցներից կան բերման ենթարկվածներ։
Ընտրություններից օրեր առաջ ձերբակալություններ են իրականացվել նաև Ստեփանավանում։ Հոկտեմբերի 21-ին ընտրակաշառքի գործով ձերբակալվել էր 14 անձ, այդ թվում՝ «Ուժեղ Հայաստան» կուսակցության համայնքապետի թեկնածու Արսեն Գևորգյանը, որը կալանավորվել է երկու ամսով։
ՏԻՄ ընտրություններին ընդառաջ ընդդիմադիրները բարձրաձայնել են նաև քաղաքական հայացքների պատճառով աշխատանքից ազատումների և վարչական ճնշումների մասին։
Պատմություններ
