«Մենք Ադրբեջանի հետ 300,000 ադրբեջանցիների վերադարձի հարց երբեք չենք քննարկել և չենք քննարկում»,- վստահեցրել է վարչապետ Նիկոլ Փաշինյանը։ Ապրիլի 30-ին կառավարությունում ճեպազրույցի ժամանակ վարչապետը նշել է, որ դա էժան ներքաղաքական շահարկում է և ոչ ավելին։
«Մենք Ադրբեջանի հետ չենք քննարկում նաև Ղարաբաղի հայերի վերադարձի հարց, Բաքվի հայերի վերադարձի հարց։ Ակնհայտորեն երկու ուղղությամբ էլ քննարկումներն ունեն պրովոկատիվ ազդեցություն ընթացիկ քաղաքական իրավիճակի վրա, և մեկը մյուսին, և հաճախ այդպես էլ պատահում է, թեժացնում են։
Դա էժան ներքաղաքական շահարկում է և ոչ ավելին։ Կան մարդիկ, որ այդ մասին խոսում են և չեն հասկանում, ինչի համար են խոսում և ինչ նպատակադրմամբ»,- ասել է Փաշինյանը։
Ընդդիմադիր ուժերը պարբերաբար համոզմունք են հայտնում, որ Փաշինյանը մտադիր է 300,000 ադրբեջանցի բերել Հայաստան։ Ընդդիմության հայտարարությունները հիմնված են Ալիևի՝ ավելի վաղ արված հայտարարության հիման վրա։
2024-ին Ադրբեջանի նախագահ Իլհամ Ալիևը Դմիտրի Կիսելյովին տված հարցազրույցում ասել էր, թե շուրջ 300,000 ադրբեջանցի պաշտոնապես դիմել է Հայաստանի ղեկավարությանը, որպեսզի իրենց վերադարձի, վերաինտեգրման համար պայմաններ ստեղծվեն։
Պատմություններ
