Փաշինյանը չի նախատեսում Բաքվի գերիների հարցը քննարկել ԵՄ գործընկերների հետ

Գևորգ Թոսունյան

Հայաստանը չի պատրաստվում Ադրբեջանում պահվող հայ գերիների հարցը քննարկել ԵՄ գործընկերների հետ, դա նախատեսում է անել Բաքվի հետ ուղիղ շփումներում. այս մասին հայտարարեց Հայաստանի վարչապետ Նիկոլ Փաշինյանը հինգշաբթի կառավարության նիստից հետո լրագրողների հետ ճեպազրույցում։

Երևանում մայիսի 4-ին կայանալու է Եվրոպական քաղաքական համայնքի գագաթնաժողովը, որին հաջորդելու է ԵՄ-Հայաստան առաջին գագաթնաժողովը մայիսի 5-ին։ Այնուհետև նախատեսվում է Ֆրանսիայի նախագահ Էմանուել Մակրոնի պետական այցը Հայաստան։

«Ադրբեջանի հետ հարցերը քննարկում ենք երկկողմ ձևաչափով: Այո՛, ես այլ ձևաչափ այս պահին արդյունավետ չեմ համարում: Մեր փորձը ցույց է տվել, որ մյուս հարթակներով քննարկումները մեծ օգուտ չեն բերում և զգալի պոտենցիալ չունեն»,- ասաց վարչապետը՝ ընդգծելով, որ գերիների վերադարձի հարցում «հսկայածավալ աշխատանք է իրականացվում»։

Նա չբացառեց այլ ձևաչափով գերիների վերադարձի հարցի քննարկումը։

«Մենք շարունակելու ենք երկկողմ ձևաչափը, բայց եթե տեսնենք արդյունավետության հնարավորություն այլ ձևաչափերում, չենք խուսափի նաև դրանցից»,- նշեց Փաշինյանը։

Բաքվում ներկայում պաշտոնապես պահվում է 19 հայ գերի, այդ թվում՝ Արցախի նախկին ռազմաքաղաքական ղեկավարներից ութը, որոնք գերեվարվել են 2023-ի սեպտեմբերին Արցախի դեմ Ադրբեջանի հարձակումից և էթնիկ զտումից հետո։

Կարդացեք նաև՝