Հայաստանի նոր անձնագրերը կունենան դրոշի գույներով մանրաթելեր․ ՆԳ նախարար

Հայաստանի նոր կենսաչափական անձնագրերը կտպագրվեն Նիդերլանդներում՝ մասնավոր գործընկերոջ արտադրամասում։ Այս մասին հայտնում է Ներքին գործերի նախարար Արփինե Սարգսյանը։ Նրա խոսքով՝ այժմ աշխատանքներ են տարվում նոր անձնագրերի վիզա էջերի տպագրական տարբերակների վրա՝ անվտանգության և գեղարվեստական լուծումների համադրմամբ։

«Նոր կենսաչափական անձնագրերի վիզայի էջերում նկարները զբաղեցնեն 1/3-րդ մասը կամ չծածկեն ջրանիշը, որը թեք լույսի ներքո ՀՀ զինանշանն է պատկերում։ Նպատակը մեկն է՝ գեղարվեստական լուծումների և անվտանգության ճիշտ համադրություն ունենալ»,- ասում է Սարգսյանը։

Նախարարի խոսքով՝ անձնագրի գունային համադրությունները կարևոր դեր ունեն կեղծումը դժվարացնելու հարցում, իսկ նպատակը այն «գրեթե անհավանական դարձնելն» է։ Սարգսյանի փոխանցմամբ՝ Հայաստանի համար մշակվել է նաև հատուկ լուծում, որի համաձայն՝ անձնագրի թղթի բաղադրության մեջ լինելու են Հայաստանի դրոշի գույներով մանրաթելեր։

Ապրիլի 28-ին վարչապետ Նիկոլ Փաշինյանը և ՆԳ նախարար Արփինե Սարգսյանը ներկայացրին 2026-ի աշնանից ներդրվելիք նոր սերնդի կենսաչափական անձնագրերի և նույնականացման քարտերի վիզուալ հայեցակարգը։ 

Առանձնահատուկ ուշադրության արժանացավ Խոր Վիրապի պատկերով էջը, որտեղ բացակայում է Արարատ լեռը, սա սոցիալական ցանցերում և հանրային դաշտում քննարկումների առիթ դարձավ։ Նոր անձնագրերում ներառված են նաև հայկական պատմության և մշակույթի տարբեր խորհրդանիշներ՝  այբուբենը, Հայկ Նահապետը, Էրեբունի ամրոցը, Էջմիածնի Մայր տաճարը, Հայաստանի մարզերի տարբեր տեսարժան վայրեր։