Իսպանիայի վարչապետ Պեդրո Սանչեսին Երևան տեղափոխող ինքնաթիռը տեխնիկական խնդրի պատճառով արտակարգ վայրէջք է կատարել Անկարայում: Մադրիդից Երևան՝ Եվրոպական քաղաքական համայնքի հանդիպմանը մեկնող օդանավի վայրէջքի մասին կիրակի օրը հայտնել է իսպանական EFE պաշտոնական լրատվական գործակալությունը:
EFE-ն, վկայակոչելով վարչապետի վարչակազմի աղբյուրները, հայտնել է, որ Սանչեսին Հայաստան տեղափոխող պաշտոնական Airbus A310 օդանավը ստիպված է եղել վայրէջք կատարել Անկարայում՝ տեխնիկական անսարքության պատճառով:
Անսարքությունը որակվել է որպես թեթև, սակայն պահպանվել են արարողակարգային բոլոր ընթացակարգերը: Սանչեսը գիշերն կանցկացրել է Անկարայում:
Սանչեսը՝ օդանավի անսարքության պատճառով, նախկինում բաց էր թողել նաև 2025-ի սեպտեպերին Փարիզում կայացած Ուկրաինայի հարցով հանդիպումը: Այդ ժամանակ Falcon տիպի օդանավը թռիչքի ընթացքում տեխնիկական խնդրի պատճառով վերադարձել էր Մադրիդ, իսկ վարչապետը հանդիպմանը մասնակցել էր առցանց տարբերակով:
Եվրոպական քաղաքական համայնքը միավորում է շուրջ 50 պետություն, այդ թվում՝ ԵՄ անդամ 27 երկրները և 20 գործընկեր պետություններ, նպատակ ունենալով խթանել համագործակցությունը ժողովրդավարության ամրապնդման, տնտեսական ու էներգետիկ անվտանգության և տարածաշրջանային խնդիրների լուծման ուղղությամբ։
Եվրոպական երկրների ղեկավարները մայիսի 3-ին արդեն ժամանել են Հայաստան:
ԵՔՀ առաջին գագաթնաժողովը տեղի է ունեցել 2022-ի հոկտեմբերին՝ Պրահայում։
Այս գագաթնաժողովի շրջանակում էր, երբ Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը Ֆրանսիայի նախագահի և Եվրոպական խորհրդի նախագահի միջնորդությամբ ստորագրված հայտարարությամբ ճանաչեցին միմյանց տարածքային ամբողջականությունն ու ինքնիշխանությունը՝ հղում անելով ՄԱԿ-ի կանոնադրությանը և 1991-ի Ալմա-Աթայի Հռչակագրին:
Հայաստանն իր համաձայնությունը հայտնեց՝ աջակցելու ԵՄ քաղաքացիական առաքելությանը Ադրբեջանի հետ սահմանի երկայնքով: Ադրբեջանը համաձայնեց համագործակցել նշյալ առաքելության հետ այնքանով, որքանով որ առնչություն կունենա:
Պատմություններ
