Ադրբեջանի նախագահ Իլհամ Ալիևն ու Իտալիայի վարչապետ Ջորջիա Մելոնին Բաքվում քննարկել են էներգետիկ, տրանսպորտային, ինչպես նաև ռազմատեխնիկական համագործակցության հարցեր։ Իտալիայի վարչապետը պաշտոնական այցով Ադրբեջան է մեկնել մայիսի 4-ի երեկոյան Երևանում կայացած Եվրոպական քաղաքական համայնքի գագաթնաժողովի աշխատանքների ավարտից հետո։
«Ցանկանում ենք ամրապնդել համագործակցությունը պաշտպանական և անվտանգային ոլորտում՝ հաշվի առնելով Իտալիայի հաջողությունները օդատիեզերական արդյունաբերության, ծովային անվտանգության, կարևոր ենթակառուցվածքների պահպանման, և բարձր տեխնոլոգիաների հարցերում», նշել է Իտալիայի վարչապետը։
Ռազմատեխնիկական ոլորտի զարգացումը հուսադրող է համարել նաև Ադրբեջանի նախագահ Ալիևը, նշելով, որ համեմատաբար նոր այդ համագործակցությունում կան համատեղ արտադրության ծրագրեր։
Հանդիպմանը կողմերը հիմնականում քննարկել են տրանսպորտային ու էներգետիկ թեմաներ, որոնց առանցքային բաղադրիչներից մեկը ադրբեջանական գազի տարանցումն է Իտալիա։
«Ցանկանում ենք, որ Ադրբեջանը Եվրոպան Ասիային կապող հիմնարար հանգույցի վերածվի», - հայտարարել է Մելոնին, միաժամանակ կոչ անելով աշխատել ոչ միայն տարանցման հանրավորության ավելացման, այլև՝ բոլոր ոլորտներում արդյունաբերական գործընկերությունների որակի բարձրացման վրա։
2025-ին երկու երկրների ապրանքաշրջանառությունը կազմել է 12 միլիարդ ԱՄՆ դոլար։ Ադրբեջանը Իտալիա գազ արտահանող հիմնական երկրներից է։ Նախորդ տարի 25 միլիարդ խորանարդ մետր գազի 9,5 միլիարդը բաժին է հասել Իտալիային։ Ադրբեջանը գազն արտահանում է Հարավային գազային միջանցքով։
Պատմություններ
