Պետությանը կվերադարձվի 3,7 միլիարդ դրամ ԱՆԻՖ-ի դուստր ընկերության ֆոնդից

ԱՆԻՖ-ի դուստր ընկերության ֆոնդի կողմից պետությանը կվերադարձվի 3,7 մլրդ դրամ։ Այդ մասին հայտնում են Պետական գույքի կառավարման կոմիտեից։ 

Ըստ կոմիտեի տարածած հաղորդագրության՝ 2020-ին COVID-19 համավարակով պայմանավորված տնտեսական մարտահրավերներին դիմակայելու նպատակով, ՀՀ կառավարությունը նախաձեռնեց 80 միլիարդ դրամ ընդհանուր բյուջեով զարգացման ծրագրեր։ Այդ շրջանակում պետությունը 10 միլիարդ դրամի փայեր ձեռք բերեց «Ձեռնարկատեր+Պետություն հակաճգնաժամային ներդրումներ» ֆոնդում, որը կառավարվում էր ԱՆԻՖ-ի ենթակայությամբ գործող ընկերության կողմից։ 2021-2023 թվականներին ֆոնդը բաժնեմասնակցային ներդրումներ է կատարել 10 փակ բաժնետիրական ընկերություններում։

Նշվում է, որ 2024-ի սեպտեմբերին ֆոնդի կառավարչի բաժնետոմսերի կառավարման լիազորությունները ԱՆԻՖ-ից փոխանցվեցին Պետական գույքի կառավարման կոմիտեին։ Սրանից հետո որոշում կայացվեց վաճառել ֆոնդին պատկանող բաժնետոմսերը։ Օտարման գինը սահմանվեց որպես ներդրված գումարի և մինչև 2025-ի ավարտը հաշվարկված 10,2% տարեկան տոկոսադրույքի հանրագումար՝ հաշվի առնելով նաև վճարված շահութաբաժինները։

Ըստ կոմիտեի՝ արդեն իսկ իրականացվել է թվով չորս ընկերությունների բաժնետոմսերի վաճառքը։ Չնայած այս ընկերություններում կատարված սկզբնական ներդրումը կազմել էր 2,9 միլիարդ դրամ, վաճառքի արդյունքում ձևավորվել է 3,7 միլիարդ դրամ։ 2026-ի մայիսի 7-ին կառավարության ընդունած որոշմամբ՝ Պետական գույքի կառավարման կոմիտեի նախագահին հանձնարարվել է իրականացնել ֆոնդի փայերի մարումը, ինչի շնորհիվ նշված ողջ գումարը կփոխանցվի ՀՀ պետական բյուջե։

Կարդացեք նաև՝ ԱՆԻՖ-ի հինգ տարվա գործունեությունը․ ձախողված ծրագրեր և դատական գործընթացներ