Հայաստանը լավ հասկանում է, որ հնարավոր չէ միաժամանակ լինել թե՛ Եվրամիության, թե՛ Եվրասիական տնտեսական միության (ԵԱՏՄ) անդամ, և երբ նման անհրաժեշտություն առաջանա, համապատասխան որոշումը կընդունեն Հայաստանի քաղաքացիները։ Այս մասին «ՏԱՍՍ»-ի թղթակցի հետ հարցազրույցում հայտարարել է ՀՀ փոխվարչապետ Մհեր Գրիգորյանը։
«Մենք շատ լավ հասկանում ենք, որ Հայաստանը չի կարող միաժամանակ լինել ԵԱՏՄ-ի և Եվրամիության անդամ, և ակնհայտ է, որ ապագայում մեզ անհրաժեշտ կլինի համապատասխան որոշում ընդունել։ Ընդ որում՝ այդ հարցի վերաբերյալ որոշումը, անշուշտ, կընդունեն Հայաստանի քաղաքացիները։ Այս պահին նման անհրաժեշտություն չկա»,- ասել է Գրիգորյանը։
Գրիգորյանը նաև նշել է, որ «Հայաստանը ԵԱՏՄ-ի լիարժեք անդամ է, կառուցողական համագործակցություն է վարում, ամբողջությամբ մասնակցում է քննարկումներին և բոլոր որոշումների ընդունման գործընթացներին»։
Մայիսի 9-ին Ռուսաստանի նախագահ Վլադիմիր Պուտինը հայտարարել էր, որ Երևանը հնարավորինս շուտ պետք է որոշի՝ մասնակցելու է Եվրամիությանը, թե ԵԱՏՄ-ին, և այդ դեպքում հնարավոր կլինի «քաղաքակիրթ բաժանման» ճանապարհ։
2025-ի մարտին Ազգային ժողովը ընդունեց «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքը։
Պատմություններ
