Արևմուտքը փորձում է Հայաստանին ներքաշել հակառուսական ճամբար՝ Ռուսաստանին «որքան հնարավոր է շատ ցավ» պատճառելու նպատակով․ այս մասին մայիսի 22-ին ասել է Ռուսաստանի արտաքին գործերի նախարար Սերգեյ Լավրովը՝ Արտաքին և պաշտպանական քաղաքականության խորհրդի նիստում իր ելույթի ժամանակ։
«Արևմուտքը փորձում է մեր դաշնակիցներին բաժանել, առաջին հերթին՝ սկսելով մեր հարևաններից, ինչպես դա արեց Վրաստանի և Մոլդովայի հետ, ինչպես հիմա անում է Ուկրաինայի հետ, և ինչպես հիմա փորձում են Հայաստանին ներքաշել նույն սխալ տրամաբանության մեջ»,- ասել է Լավրովը։
Նա ընդգծել է, որ այս ամենը արվում է մեկ նպատակով։
«Ռուսաստանին որքան հնարավոր է շատ ցավ պատճառել, եթե կարելի է այդպես ասել, որպեսզի ավելի դժվար լինի Ռուսաստանի պահպանումն ու ամրապնդումը՝ որպես իսկապես մեծ տերություն և քաղաքակրթություն»,- շեշտել է ՌԴ արտգործնախարարը։
․․․
Մայիսի 9-ին Ռուսաստանի նախագահ Վլադիմիր Պուտինը հայտարարել էր, որ Երևանը հնարավորինս շուտ պետք է որոշի՝ մասնակցելու է Եվրամիությանը, թե ԵԱՏՄ-ին, և այդ դեպքում հնարավոր կլինի «քաղաքակիրթ բաժանման» ճանապարհ։
2025-ի մարտին Ազգային ժողովն ընդունել էր «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքը։ Ռուսաստանի բարձրաստիճան պաշտոնյաները հաճախ են շեշտում, որ Եվրոպական միությունը Հայաստանի հետ համագործակցում է հիմնականում Ռուսաստանի հետ իր դիմակայությունը սրելու նպատակով։
Պատմություններ
