Ռուսական անօդաչու թռչող սարքը (ԱԹՍ) հարվածել է Ռումինիայում գտնվող բնակելի շենքի՝ առաջացնելով հրդեհ։ Երկու մարդ վիրավորել է։ Միջադեպը հանգեցրել է ՆԱՏՕ-ի և Եվրամիության պաշտոնյաների կոշտ արձագանքին։ Այս մասին հայտնում է BBC-ն։
Դեպքը տեղի է ունեցել մայիսի 29-ին Ուկրաինայի և Մոլդովայի հետ Ռումինիայի արևելյան սահմանին մոտ գտնվող Գալաց քաղաքում։
Ի պատասխան կատարվածի՝ Եվրահանձնաժողովի նախագահ Ուրսուլա ֆոն դեր Լայենը հայտարարել է, որ Ռուսաստանի «ագրեսիվ պատերազմը հատել է ևս մեկ սահման», իսկ ՆԱՏՕ-ն դատապարտել է «Ռուսաստանի անխոհեմությունը»։
Ուկրաինայի հետ չորս տարի տևող պատերազմի ընթացքում ռուսական ԱԹՍ-ները մի քանի անգամ հատել են Ռումինիայի սահմանը, սակայն սա առաջին դեպքն է, երբ ՆԱՏՕ-ի անդամ պետության քաղաքացիներ են տուժում։ Ռուսական կողմն առայժմ չի մեկնաբանել միջադեպը։
Նախագահ Նիկուշոր Դանը հրավիրել է Ռումինիայի Գերագույն պաշտպանության խորհրդի արտահերթ նիստ՝ ռուսական ԱԹՍ-ի հարվածը որակելով որպես «ամենալուրջ միջադեպը, որն ազդել է Ռումինիայի տարածքի վրա Ուկրաինայի դեմ Ռուսաստանի ագրեսիվ պատերազմի մեկնարկից ի վեր»։
Ռումինիայի պաշտպանության նախարարությունը հայտնել է, որ անօդաչու թռչող սարքերի հայտնաբերումից հետո օդ են բարձրացվել երկու F-16 կործանիչներ։ Բրիգադի գեներալ Գեորգե Մաքսիմի խոսքով՝ ԱԹՍ-ի հայտնաբերման և հարվածի պահի միջև բանակն ունեցել է ընդամենը չորս րոպե։
Գեներալ Մաքսիմը նշել է, որ ռումինական զինված ուժերը գործել են զգալի սահմանափակումների պայմաններում, քանի որ իրավունք չեն ունեցել կիրառել զինամթերք, որը կխախտեր Ուկրաինայի օդային տարածքը։
«Ուկրաինան պատերազմի մեջ է, իսկ Ռումինիան՝ խաղաղության։ Մենք չենք կարող արկ արձակել Ուկրաինայի օդային տարածք», - պարզաբանել է նա։
Պատմություններ
