Ռուսաստանի կողմից Հայաստանի հասցեին հնչող հայտարարություններն իրականում վերաբերում են ոչ միայն Երևանին, ուստի միջազգային հանրությունը պետք է ավելի շատ մտածի անվտանգության մասին և աջակցություն ցուցաբերի Հայաստանին։ Այս մասին հայտարարել է Ուկրաինայի նախագահ Վլադիմիր Զելենսկին, հայտնում է «Եվրոպեյսկայա պրավդա» պարբերականը։ Ըստ Զելենսկու՝ Ռուսաստանն այժմ շատ ավելի բացահայտ է սպառնում Հայաստանին, քան նախկինում։
«Ռուսաստանի յուրաքանչյուր հարևան լսեց Հայաստանի մասին այդ խոսքերը, որի ժողովուրդը միակն է, որ իրավունք ունի և ընտրելու է իր երկրի ապագան։ Եվ այն, ինչ Ռուսաստանն ասում է Հայաստանի մասին, իրականում միայն նրան չի վերաբերում։ Բոլորը պետք է ավելի շատ մտածեն անվտանգության մասին և ավելի շատ համատեղ քայլեր ձեռնարկեն, որպեսզի քաղաքական գործընկերություններն աշխատեն, և լինեն ժամանակակից պաշտպանական արտադրություններ, պաշտպանության ժամանակակից կարողություններ, ինչպես նաև առավելագույնս ճյուղավորված ու դիվերսիֆիկացված տնտեսական կապեր»,- հայտարարել է Ուկրաինայի նախագահը։
Զելենսկին հույս է հայտնել, որ այս հարցերում Եվրոպայի և հատկապես Եվրամիության դիրքորոշումը կլինի սկզբունքային, ուժեղ և ժամանակին։
Ուկրաինայի նախագահը շեշտել է, որ ոչ մեկին չի կարելի թողնել առանց աջակցության, և Եվրոպան իրավունք չունի կորցնելու որևէ ժողովրդի կամ երկրի։ Երկրի ղեկավարի խոսքով՝ անհրաժեշտ է աջակցել Հայաստանին, Մոլդովային, Բալթյան երկրներին և Ադրբեջանին, ինչպես նաև ուղիներ գտնել Վրաստանի ժողովրդին սատարելու համար, ինչն ընդհանուր եվրոպական խնդիր է։
Ավելի վաղ Ռուսաստանի նախագահ Վլադիմիր Պուտինը հայտարարել էր, որ եվրաինտեգրման ձգտումների պատճառով Հայաստանին կարող է սպառնալ «ուկրաինական սցենարը»։ Աստանայում կայացած ԵԱՏՄ գագաթնաժողովի արդյունքներով հրավիրված ասուլիսի ժամանակ Պուտինը նշել էր, որ Ուկրաինայում ճգնաժամը ժամանակին սկսվել է հենց ԵՄ-ին միանալու փորձերից։
Նախօրեին Ռուսաստանը հետ էր կանչել Հայաստանում իր դեսպանին՝ «Եվրամիության հետ մերձեցմանն ուղղված հայկական ղեկավարության քայլերը քննարկելու նպատակով»։
Բացի այդ, վերջին օրերին Մոսկվան զգուշացրել է, որ Հայաստանը ռիսկի է դիմում զրկվել էժան գազի մատակարարումներից, և սահմանափակել է հայկական ապրանքների՝ մասնավորապես մրգերի, բանջարեղենի, ծաղիկների և կոնյակի ներմուծումը։
Հունիսի 7-ին Հայաստանում տեղի են ունենալու խորհրդարանական ընտրություններ։
Պատմություններ
