Ռուսաստանի սահմանած արգելքներն աստիճանաբար կվերացվեն ընտրություններից հետո․ նախարար

Հայաստանում խորհրդարանական ընտրություններից հետո դեպի Ռուսաստան արտահանում իրականացնող ընկերությունների նկատմամբ արգելքներն աստիճանաբար կհանվեն։ Այս մասին լրագրողների հետ զրույցում ասել է էկոնոմիկայի նախարար Գևորգ Պապոյանը հունիսի 1-ին Երևանում նախընտրական քարոզարշավի ժամանակ։ Պապոյանի խոսքով՝ Հայաստանից ներկրվող որոշ ապրանքների նկատմամբ Ռուսաստանի արգելքները  տեխնիկական են և հասցեատերն էկոնոմիկայի նախարարությունը չէ, Սննդի անվտանգության տեսչական մարմինն է։

«Իմ տեղակալը եղել է վերջերս Աստանայում և հանդիպել է Ռուսաստանցի գործընկերների հետ, մթնոլորտը շատ դրական է և բոլոր կողմերը հակված են խնդրին լուծում տան, և ես կարծում եմ, որ ընտրություններից հետո շատ արագ այս հարցերին լուծում կտանք»,- ասել է Պապոյանը։

Անդրադառնալով Հայաստանի վարչապետի և Ռուսաստանի նախագահի` հունիսի 1-ին կայացած հեռախոսազրույցի բովանդակությանը, Պապոյանը հայտնել է, որ շատ ջերմ զրույց է եղել երկու երկրների ղեկավարների միջև, և բոլոր հարցերը կլուծվեն։

Հայաստանն արտահանում կիրականացնի դեպի Հունաստան, Գերմանիա և այլ երկրներ։ Նախարարը հայտնել է, որ այսօր էկոնոմիկայի նախարարությունը արտահանման աջակցության ծրագրեր է ներկայացրել դեպի Եվրոպական Միություն, Մերձավոր Արևելք՝ տրանսպորտային ծախսերի փոխհատուցում, մաքսատուրքի փոխհատուցում, IP-ի հետ կապված ծախսերի փոխհատուցում։

«Եվրոպական Միության արտահանումը կրկնապատկվել է, նպատակ ունենք քառապատկենք, հնգապատկենք մինչև տարեվերջ»,- ասել է Պապոյանը։ 

Հայաստանի խորհրդարանական ընտրություններից առաջ Ռուսաստանը կոշտացրել է իր հռետորաբանությունը Հայաստանի նկատմամբ։

ՌԴ նախագահ Վլադիմիր Պուտինն ավելի վաղ հայտարարել էր, որ Հայաստանը ստիպված կլինի ընտրություն կատարել Եվրամիության և ԵԱՏՄ-ի միջև։ Վարչապետ Նիկոլ Փաշինյանը պնդել է, որ ԵԱՏՄ-ից դուրս գալն այժմ Երևանի օրակարգում չէ։

Այս հայտարարությունների ֆոնին Ռուսաստանը շարունակում է սահմանափակել հայկական ապրանքների մուտքն իր շուկա։ Հունիսի 2-ից կարգելվի հայկական ձկնամթերքի ներմուծումը՝ բացառությամբ երկու ընկերության։ Մայիսի 30-ից «Ռոսպոտրեբնադզոր»-ի որոշմամբ սահմանափակվել է  պտուղ-բանջարեղենի ներմուծումը։ Նախկինում նմանատիպ արգելքներ էին կիրառվել ծաղիկների, «Ջերմուկ» հանքային ջրի, ինչպես նաև մի քանի տեղական արտադրողների կոնյակի և գինու նկատմամբ։

Ռուսաստանի մի քանի պաշտոնյա հայտարարել են, որ Ռուսաստանը կարող է Հայաստանին գազ վաճառել շուկայական գնով՝ արտոնյալ գնի փոխարեն։