«Ինչպես նախկինում, այնպես էլ այժմ պատրաստ ենք աջակցել Բաքվին և Երևանին տրանսպորտային և տնտեսական հաղորդակցությունների ապաշրջափակման, հումանիտար հարցերի լուծման գործընթացում, ինչպես նաև նախապատրաստել և տրամադրել ռուսական հարթակ խաղաղության պայմանագրի ստորագրման համար», - հունիսի 4-ին այս մասին հայտարարել է Ռուսաստանի արտաքին գործերի նախարարի տեղակալ Միխայիլ Գալուզինը։
Գալուզինի խոսքով՝ Ռուսաստանը հետևողականորեն աջակցում է Ադրբեջանի և Հայաստանի այն ջանքերին, որոնք միտված են երկկողմ հարաբերությունների լիարժեք և համապարփակ կարգավորմանը՝ հիմնվելով 2020-2022-ին Ռուսաստանի, Ադրբեջանի և Հայաստանի ղեկավարների միջև ձեռք բերված եռակողմ պայմանավորվածությունների վրա։
ՏԱՍՍ-ի փոխանցմամբ՝ Ռուսաստանի փոխարտգործնախարարը նաև նշել է, որ Մոսկվան «զգալի ներուժ» է տեսնում «3+3» տարածաշրջանային համագործակցության հարթակում, որը միավորում է Ռուսաստանին, Իրանին, Թուրքիային, Ադրբեջանին, Հայաստանին և Վրաստանին՝ այսինքն՝ Հարավային Կովկասի երկրներին և նրանց պատմական հարևաններին։
«Այս մեխանիզմը կոչված է նպաստելու տարածաշրջանի խնդիրների լուծմանը հենց տարածաշրջանի երկրների և նրանց հարևանների ուժերով՝ առանց արտաքին ապակառուցողական միջամտության», - նշել է Գալուզինը։
Պատմություններ
