Իշխող «Քաղաքացիական պայմանագիր» կուսակցությունը առաջիկա խորհրդարանական ընտրությունների շրջանակում միայն Երևանում 36 շտաբի տարածք է նվեր ստացել։ Դրանք ՔՊ-ին տրամադրվել են անհատույց օգտագործման իրավունքով՝ մեծամասամբ քարոզարշավի ընթացքում՝ մայիսի 1-ից մինչև հունիսի 15-ը օգտագործելու համար։
«Ազատություն»-ը ԿԸՀ ներկայացված մի շարք փաստաթղթերի ուսումնասիրությամբ պարզել է, որ այս նվիրատվությունները իշխող ուժին կատարել են գործող պաշտոնյաներ, խոշոր գործարարներ, օլիգարխների հետ փոխկապակցված անձինք։
Միայն Երևանում ՔՊ-ն ունի 106 շտաբ, որոնցից առնվազն 36-ը՝ մեկ երրորդը, անհատույց օգտագործմամբ են հանձնվել իշխող կուսակցությանը։ Երևանի բոլոր վարչական շրջաններում սփռված այդ տարածքների մի մասի սեփականատերերը իշխող ուժի ներկայացուցիչներ են կամ համակիրներ, սակայն մի էական մասի դեպքում էլ շտաբերը նվիրատվությամբ ՔՊ-ին հանձնել են խոշոր գործարարներ, պաշտոնյաներ, օլիգարխների հետ կապված անձինք։ Կուսակցությունների մասին օրենքի համաձայն՝ անհատույց օգտագործմամբ տարածքներ հանձնելու այս դեպքերը համարվում են նվիրատվություն և պետք է արտացոլվեն ՔՊ-ի՝ գալիք տարվա հաշվետվությունում։
Երևանի կենտրոնի ամենաթանկ հատվածներից մեկում՝ Կասկադում, անհատույց օգտագործմամբ ՔՊ-ին է անցել 177 քմ տարածք Թամանյան 6 հասցեում։ Տարածքը իշխող կուսակցությանը հատկացրել է ռուսաստանաբնակ գործարար Արգամ Վերդյանի կինը՝ Աննա Գևորգյանը։ Արգամ Վերդյանը մի քանի ընկերություններ ունի Մոսկվայում, նաև «Օգնություն տարեցներին» բարեգործական հիմնադրամի տնօրենն է, որն օգնություն է հասցնում կարիքավոր ծերերին։ Ըստ որոշ տվյալների՝ հիմնադրամը մասամբ ֆինանսավորվում է Վերդյանի անձնական միջոցներից։ Ի դեպ, 2014-ի դրությամբ Վերդյանը Արա Աբրահամյանի կողմից ղեկավարվող Հայերի միության անդամներից է եղել, Վերդյանը ՀՀ-ում ընկերություններ չունի։
«Ծառուկյան» խմբակցության նախկին պատգամավոր, սյունեցի Մերուժան Սիմոնյանի որդին՝ Համլետ Սիմոնյանը, անհատույց օգտագործմամբ «Քաղաքացիական պայմանագրին» է տվել Նորք-Մարաշում՝ Արմենակյան 106 հասցեում գտնվող 450 քմ մակերեսով գրասենյակը։ Մերուժան Սիմոնյանը 1995–2012 թվականներին աշխատել է Պետեկամուտների կոմիտեի համակարգում։ 2012–2018 թվականներին նա պատգամավոր էր «Բարգավաճ Հայաստան»-ից։ Պատգամավորական մանդատից Սիմոնյանը հրաժարվեց 2018-ի աշնանը։
Ամբողջական հոդվածը՝ սկզբնաղբյուրում
Պատմություններ
