Արման Թաթոյանը մեծ սպասելիքներ ունի 2026-ի խորհրդարանական ընտրություններից

«Միասնության թևեր» կուսակցության վարչապետի թեկնածու Արման Թաթոյանը մեծ սպասելիքներ ունի 2026-ի խորհրդարանական հերթական ընտրություններից։

«Այս ընտրությունները պատմական նշանակություն ունեն։ Մենք այսօր որոշում ենք մեր ապագան։ Մեզ պետք է պատասխանատու իշխանություն, որ երբեք ուրիշի վրա մեղքը չգցի, աշխատի միայն հանուն պետականության»,- հունիսի 7-ին ընտրություն կատարելուց հետո լրագրողների հետ զրույցում ասել է Թաթոյանը։

Արման Թաթոյանը վստահեցրել է, որ իրենց ուժը պատրաստ է հետընտրական ցանկացած գործընթացի։ 

«Սահմանադրության շրջանակում մենք գործադրելու ենք մեր բոլոր միջոցները»,- ասել է Թաթոյանը։

Թաթոյանն ուղիղ չի պատասխանել, որդյոք վստա՞հ է, որ Հայաստանն ընտրություններից հետո նոր իշխանություն կունենա, թե ոչ։  

«Ես վստահ եմ, որ ժողովուրդը դրա պատասխանը կտա։ Մենք այլ ելք չունենք, քան երկրում արդարություն հաստատելը»,- ասել է նա։

2026-ի Ազգային ժողովի ընտրություններին մասնակցում է 16 քաղաքական կուսակցություն և կուսակցությունների երկու դաշինք։ Տարբեր հարցումների համաձայն՝ առաջատարը վարչապետ Նիկոլ Փաշինյանի «Քաղաքացիական պայմանագիր» կուսակցությունն է, որին հաջորդում են միլիարդատեր Սամվել Կարապետյանի «Ուժեղ Հայաստան» դաշինքը և Հայաստանի նախկին նախագահ Ռոբերտ Քոչարյանի «Հայաստան» դաշինքը։

Խորհրդարան անցնելու համար կուսակցություններից պահանջվում է հավաքել ընտրողների ձայների 4 տոկոսը, իսկ վերոնշյալ դաշինքներից՝ 8 տոկոսը։