Առաջիկայում կորոշենք՝ պատրաստ ենք հրապարակել Սահմանադրության տեքստը, թե ոչ․ նախարար

Սահմանադրության տեքստն առաջիկա մեկ կամ երկու շաբաթվա ընթացքում կամբողջացնենք, ևս մեկ քննարկում կունենանք և կորոշենք՝ պատրաստ ենք հրապարակել այն, թե ոչ։ Այս մասին հունիսի 10-ին ԱԺ-ում ճեպազրույցի ժամանակ լրագրողներին ասել է արդարադատության նախարար Սրբուհի Գալյանը։

«Տեքստը պատրաստ չէ հրապարակման, քանի որ մի շարք մեր գործընկերներ չեն հասցրել դիտարկումներ ներկայացնել։ Որոշել ենք չհրապարակել՝ չենք հրապարակել, կորոշենք հրապարակել՝ կհրապարակենք»,- ասել է Գալյանը։

Նախարարը փետրվարի 4-ին 2025-ի գործունեության ամփոփիչ մամուլի ասուլիսի ժամանակ հայտարարել էր, որ նոր Սահմանադրության տեքստը պատրաստ կլինի և հրապարակման ենթակա կդառնա արդեն մարտին։

Լրագրողի հարցին՝ արդյոք խորհրդարանական ընտրություններում սահմանադրական մեծամասնություն չստանալուց հետո «Քաղաքացիական պայմանագիրը» հնարավորություն կունենա՞ փոխել Սահմանադրությունը, նախարարն արձագանքել է, որ ՔՊ-ն մինչ այս էլ սահմանադրական մեծամասնություն չուներ, սակայն սկսել է Սահմանադրության փոփոխության գործընթացը։ 

Հարցին, թե այս պայմաններում ինչ սցենար է պատկերացնում իշխանությունը, որով Սահմանադրությունը հնարավոր կլինի փոխել, Գալյանը նշեց՝ սցենարները թողնում են ապագայի քննարկմանը։

«Խնդիր չունենք պրոցեսը կուլիսների հետևում պահելու և չենք էլ կարող։ Մեր առաջին նպատակը հանրության հետ քննարկում սկսելն է։ Դրանից հետո պետք է հասկանանք ինչ արձագանք ենք ունենում հասարակությունից։ Մենք պետք է բացատրենք նոր կարգավորումներն ինչի մասին են, պետք է անենք փոփոխություններ, վերջնականացնենք պրոցեսը, հետո կհասկանանք ինչ ճանապարհով ենք գնում»,- նշել է նախարարը։

Հունիսի 7-ի խորհրդարանական ընտրությունների արդյունքում իշխող «Քաղաքացիական պայմանագիր» կուսակցությունը ստացել է 49,8 % քվե, ինչը չի բավարարում խորհրդարանում սահմանադրական մեծամասնություն կազմելու համար։

Առանց խորհրդարանական ձայների 2/3-ի իշխող ուժը չի կարող հանրաքվեի դնել Սահմանադրության հիմնարար հոդվածների փոփոխությունները։

***

2025-ի փետրվարին վարչապետ Նիկոլ Փաշինյանը հայտարարել է երկրում նոր սահմանադրության ընդունելու անհրաժեշտության մասին։

Նոր Սահմանադրության անհրաժեշտության մասին վարչապետը խոսել է Բաքվից հնչող պահանջների ֆոնին։ Չնայած, որ 2018-ի հեղափոխությունից հետո Փաշինյանը հայտարարել էր սահմանադրական բարեփոխումների անհրաժեշտության մասին։

Բաքուն պնդում է, որ Հայաստանի Սահմանադրության նախաբանը, որը հղում է անում Հայաստանի 1990-ի Անկախության հռչակագրին, տարածքային պահանջ է ենթադրում Ադրբեջանին, քանի որ Անկախության հռչակագիրն իր հերթին հղում է անում Հայկական ԽՍՀ-ի՝ Լեռնային Ղարաբաղի Ինքնավար Մարզի վերամիավորման մասին օրենքին։

Պաշտոնական Բաքուն պարբերաբար հայտարարում է, որ «Խաղաղության պայմանագրի ստորագրման գլխավոր պայմանը Հայաստանի Սահմանադրության փոփոխությունն է»։

Հունիսի 7-ին Հայաստանի խորհրդարանական ընտրություններից անմիջապես հետո Բաքվից կրկին հիշատակեցին Հայաստանի Սահմանադրության փոփոխության մասին։