Էրդողանը շնորհավորել է Փաշինյանին՝ ընտրություններում ՔՊ-ի հաղթանակի առթիվ

Թուրքիայի նախագահ Ռեջեթ Թայիփ Էրդողանը շնորհավորական ուղերձ է հղել վարչապետ Նիկոլ Փաշինյանին՝ խորհրդարանական ընտրություններում «Քաղաքացիական պայմանագիր» կուսակցության հաղթանակի առթիվ: Այս մասին հայտնում են կառավարությունից։

«Իմ ժողովրդի և անձամբ իմ անունից սրտանց շնորհավորում եմ Ձեզ՝ 2026-ի հունիսի 7-ին Հայաստանի Հանրապետությունում անցկացված խորհրդարանական ընտրություններում Ձեր ղեկավարած «Քաղաքացիական պայմանագիր» կուսակցության արձանագրած հաջողության առթիվ և հաջողություն մաղթում երրորդ անգամ կառավարություն ձևավորելու գործում:

Ես լիովին հավատացած եմ, որ տարածաշրջանում երկարատև խաղաղության և կայունության հաստատման և այդ ուղղությամբ անհրաժեշտ համագործակցության ապահովման վերաբերյալ Ձեր ռազմավարական տեսլականը հաջողությամբ ավարտին կհասցվի: Օգտվելով առիթից՝ կրկին մաղթում եմ Ձեզ առողջություն և բարեկեցություն, իսկ Հայաստանի ժողովրդին՝ բարգավաճում և երջանկություն»,- ասել է Էրդողանը:

ԿԸՀ-ն ամփոփել է հունիսի 7-ի խորհրդարանական ընտրությունների բոլոր 2005 ընտրատեղամասի նախնական արդյունքները։

Նախնական արդյունքներով «Քաղաքացիական պայմանագիր» կուսակցությունը ստացել է քվեների 49,8 %-ը։

Ընդդիմադիր մի քանի ուժերի դիմումների հիման վրա հունիսի 9-ին մի քանի տասնյակ ընտրատեղամասերում ձայների վերահաշվարկ է սկսվել։ Խորհրդարանական ընտրությունների վերջնական արդյունքների մասին ԿԸՀ-ն կհայտնի հունիսի 14-ին։