«Ուժեղ Հայաստան» դաշինքը հունիսի 12-ին դիմելու է Կենտրոնական ընտրական հանձնաժողով՝ ընտրության արդյունքները չեղյալ հայտարարելու և «Քաղաքացիական պայմանագիր» կուսակցության ձայները վերահաշվարկելու պահանջով։ Այս մասին ֆեյսբուքյան էջում հայտնել է դաշինքի պատգամավորի թեկնածու Նարեկ Կարապետյանը։
Կարապետյանի խոսքով՝ եթե իրենց դիմումն անպատասխան մնա՝ կդիմեն Սահմանադրական դատարան։
«Սիրելի հայրենակիցներ, դուք ձեր աչքով եք տեսել, որ տասնյակ և հարյուրավոր ընտրատեղամասերում վերանայման արդյունքում Քաղաքացիական պայմանագիր կուսակցության ձայների շեշտակի անկում է նկատվել։ Դուք ձեր աչքով եք տեսել, թե ինչպես են զինվորներին ուղղորդված տանում ընտրությունների։ Դուք ձեր աչքով եք տեսել, թե ինչպես են պետական կառավարման մարմինների աշխատակիցներին ուղղորդում, որպեսզի քվեարկեն ՔՊ-ի օգտին»,- ասել է Կարապետյանը։
«Հայաստան» դաշինքը ևս հայտարարել է, որ խորհրդարանական ընտրությունների քվեների վերահաշվարկից հետո դիմել Սահմանադրական դատարան՝ վիճարկելու ընտրության արդյունքները։
Հայաստանի խորհրդարանական ընտրությունները կայացել են հունիսի 7-ին։ Նախնական արդյունքներով անցողիկ շեմը հաղթահարել է երեք ուժ՝ 2 դաշինք, 1 կուսակցություն։
«Քաղաքացիական պայմանագիր» կուսակցություն-727 827 քվե, 49,8 %
«Ուժեղ Հայաստան» դաշինք- 340 088 քվե, 23,28%
«Հայաստան» դաշինք- 145 113 քվե, 9,93%։
Հունիսի 9-ին ընտրատարածքային ընտրական հանձնաժողովներում դիմումների հիման վրա ընտրությունների քվեների վերահաշվարկ է սկսվել։ Վերահաշվարկի արդյունքները կհրապարակվեն հունիսի 14-ին։ Վերահաշվարկի արդյունքում պարզ կլինի արդյոք «Բարգավաճ Հայաստան» կուսակցությունը կանցնի Ազգային ժողով, թե ոչ։ Քվեների հաշվարկի նախնական արդյունքով ԲՀԿ-ն ստացել է 3,9 % քվե։ Կուսակցությունների համար անցողիկ շեմը 4 %-ն է։
Պատմություններ
