Միջազգային խաղաղապահ առաքելություններում մասնակցության նախապատրաստման շրջանակում հունիսի 17-25-ը Հայաստանի Հանրապետությունում կանցկացվի արդեն ամենամյա դարձած «Արծիվ գործընկեր-2026» զորավարժությունը։ Այդ մասին հայտնում են ՀՀ պաշտպանության նախարարությունից։
Ըստ աղբյուրի՝ զորավարժությանը մասնակցելու են ՀՀ ԶՈՒ խաղաղապահ բրիգադի (250 մասնակից), Եվրոպայում և Աֆրիկայում ԱՄՆ ցամաքային զորքերի ու Կանզասի ազգային գվարդիայի (58 մասնակից), Ֆրանսիայի (24 մասնակից), Հունաստանի (11 մասնակից) զինված ուժերի զինծառայողները:
Զորավարժության ընթացքում կանցկացվեն խաղաղապահ առաջադրանքների նախապատրաստման և իրականացման վարժանքներ:
Նշվում է, որ «Արծիվ գործընկեր-2026» զորավարժության նպատակն է բարձրացնել միջազգային խաղաղապահ առաքելությունների մասնակցող ստորաբաժանման փոխգործակցելիության մակարդակը խաղաղապահ գործողությունների շրջանակում, իրականացնել կառավարման և մարտավարական հաղորդակցման լավագույն փորձի փոխանակում, ինչպես նաև ամրապնդել ՀՀ ԶՈՒ խաղաղապահ ստորաբաժանման պատրաստվածությունը:
Նախորդ տարի՝ 2025 թվականի օգոստոսի 12-20-ը, նույնպես անցկացվել էր «Արծիվ գործընկեր-2025» հայ-ամերիկյան համատեղ զորավարժությունը։ Այդ ժամանակ վարժանքներին մասնակցում էին միայն Եվրոպայում ու Աֆրիկայում ԱՄՆ ցամաքային զորքերի, Կանզասի ազգային գվարդիայի և ՀՀ ԶՈՒ խաղաղապահ բրիգադի զինծառայողները, որոնք հիմնականում անցկացնում էին բուժօգնության հարցերի շուրջ ուսուցում և իրականացնում կիրառվող սարքավորումների համեմատում։
Պատմություններ
