ԱԺ նախագահի թեկնածու է ընտրվել Ռուբեն Ռուբինյանը

«Քաղաքացիական պայմանագիր» կուսակցության վարչության նիստում հունիսի 25-ին փակ գաղտնի քվեարկության արդյունքում Ազգային ժողովի նախագահի թեկնածու է ընտրվել Ռուբեն Ռուբինյանը: 

Լրագրողների հետ զրույցում Ռուբինյանն ասել է, որ դա քաղաքական որոշում է։

«Ենթադրում եմ, որ գործընկերների մեծ մասը համարել է, որ այս փուլում ճիշտ կլինի, որ ես զբաղեցնեմ այդ պաշտոնը, և դա նորմալ գործընթաց է։ Քաղաքական առումով որոշումը կայացված է»,- ասել է Ռուբինյանը։

Ռուբինյանը նշել է, որ քվեարկության արդյունքն իր համար միանշանակ սպասելի չէր, բայց նաև սպասելի էր։

«Չեմ կարող ասել՝ դա սպասելի էր, թե ոչ, սակայն արդյունքից շոյված եմ։ Վստահությունը ինձ համար շատ պարտավորեցնող է, բայց չեմ կարող ասել, որ ինչ-որ բան պետք է ավելի լավ անեմ, քան նախորդ նախագահը։ Ալեն Սիմոնյանը շատ լավ ԱԺ նախագահ է եղել և առաջինն է, ով նախագահել է մինչև ժամկետի ավարտը։ Հայկ Կոնջորյանը եղել է խմբակցության շատ լավ ղեկավար։ Մենք նախորդ հինգ տարիների ընթացքում իրականացրել ենք շատ մեծ և պատասխանատու աշխատանք՝ անցնելով մեծ փորձությունների միջով»,- ասել է Ռուբինյանը։

ԱԺ նախագահի հավանական թեկնածուներն էին՝ գործող ԱԺ նախագահ Ալեն Սիմոնյանը, Ռուբեն Ռուբինյանը և Հայկ Կոնջորյանը։ 

Ռուբեն Ռուբինյանը 2015-2018-ին եղել է քաղաքացիական ակտիվիստ և «Քաղաքացիական պայմանագիր» կուսակցության համահիմնադիր: 2018-2019-ին զբաղեցրել է արտաքին գործերի նախարարի տեղակալի պաշտոնը: 2019-2021-ին եղել է ԱԺ պատգամավոր և արտաքին հարաբերությունների մշտական հանձնաժողովի նախագահ: 2021-ի օգոստոսից Ազգային ժողովի նախագահի տեղակալն է, իսկ դեկտեմբերից՝ նաև Հայաստան-Թուրքիա հարաբերությունների կարգավորման գործընթացում Հայաստանի հատուկ ներկայացուցիչը: