ՍԴ դատավորների աշխատավարձերի բարձրացման նոր նախագիծ չկա․ օրենքն ընդունվել է ամիսներ առաջ

Սոցցանցերում հունիսի 30-ից տարածվում է էկրանապատկեր, որում արդարադատության նախարար Սրբուհի Գալյանի լուսանկարն է՝ կից տեքստով, թե նա Ազգային ժողով է ներկայացրել Սահմանադրական դատարանի դատավորների աշխատավարձերը բարձրացնելու նախագիծ։

«Ընտրությունների արդյունքները վիճարկելու գործով Սահմանադրական դատարանում «Քաղաքացիական պայմանագիր» կուսակցության ներկայացուցիչ, արդարադատության նախարար Սրբուհի Գալյանն Ազգային ժողովի ՔՊ խմբակցության պատգամավորների հաստատմանն է ներկայացրել օրենքի նախագիծ, որը նախատեսում է բարձրացնել Սահմանադրական դատարանի դատավորների աշխատավարձերը»,- գրված է «Ուժեղ Հայաստան» էջի տարածած էկրանապատկերում։

Ավելին, ֆեյսբուքյան էջը էկրանապատկերը տարածելիս ռուսերեն գրառմամբ պնդել է, թե «հենց ճակատագրական գործընթացի ընթացքում իշխանությունը դատավորներին «ոսկոր» է նետում՝ աշխատավարձերը բարձրացնելու խոստման տեսքով։ Սա պարզապես շահերի բախում չէ, այլ ուղղակի և ցինիկ փորձ՝ ֆինանսապես կաշառելու նրանց, ովքեր պետք է վճիռ կայացնեն նույն այդ իշխանության՝ ղեկին գտնվելու օրինականության վերաբերյալ»։

Սակայն Գալյանը դատավորների աշխատավարձերի բարձրացման նոր օրինագիծ չի ներկայացրել։ 

Նոր նախագիծ չկա

#CivilNetCheck-ը կապ հաստատեց Արդարադատության նախարարության մամուլի քարտուղար Մարիամ Մելքումյանի հետ, որը հերքեց նման նոր նախագծի գոյությունը։

Պաշտոնական տվյալները փաստում են, որ ՍԴ դատավորների աշխատավարձերը բարձրացնելու նախագիծը ներկայացվել և ամբողջությամբ ընդունվել է ընտրական գործընթացներից ու ՍԴ նիստերից ամիսներ առաջ։

Կառավարությունը՝ ի դեմս արդարադատության նախարար Սրբուհի Գալյանի, նախագիծը պաշտոնապես ԱԺ էր ներկայացրել դեռ հունվարի 26-ին։ Դրանից հետո՝ փետրվար և մարտ ամիսներին, այն անցել է փորձագիտական փուլ, ստացել ԱԺ պետական-իրավական հարցերի մշտական հանձնաժողովի դրական եզրակացությունն ու ընդգրկվել խորհրդարանի նիստերի օրակարգ։

Արդեն մարտ-ապրիլ ամիսներին խորհրդարանն այն ընդունել է երկու ընթերցմամբ, օրենքը հանրապետության նախագահի կողմից ստորագրվել է ապրիլի 27-ին։ Այն ուժի մեջ է մտել մայիսի 1-ից:

Ինչպես է տարածվել տեղեկությունը

Էկրանապատկերի վրա տեսանելի չէ, թե որտեղից է այն վերցվել կամ որևէ ամսաթիվ։ #CivilNetCheck-ը պարզեց, որ այն նույնությամբ կրկնում է «Ուժեղ Հայաստան» դաշինքի պատգամավորի թեկնածու Էդգար Ղազարյանի՝ հունիսի 30-ի ֆեյսբուքյան գրառումը։ Այն հրապարակվել է ավելի վաղ, քան վերոնշյալ էկրանապատկերը:

#CivilNetCheck-ը կապ հաստատեց Էդգար Ղազարյանի հետ։ Թեև նրա գրառման ձևակերպումը՝ «Սրբուհի Գալյանը [...] հաստատմանն է ներկայացրել օրենքի նախագիծ, որը նախատեսում է բարձրացնել […]», տպավորություն է ստեղծում, թե խոսքը ընթացիկ գործընթացի մասին է, Ղազարյանը նշեց, որ իր գրառումը չի վերաբերում վերջին օրերին ներկայացված նախագծի մասին։ 

«Սրբուհի Գալյանը, որը ՔՊ-ի ներկայացուցիչն է հիմա Սահմանադրական դատարանում, նաև նույն անձն է, ով ներկայացրել է օրենքի նախագիծը Ազգային ժողովում։ Ես ժամկետ չեմ նշել, խոսքը նոր նախագծի մասին չէ»,- ասաց Ղազարյանը։ 

Այսպիսով, ՍԴ դատավորների աշխատավարձերի բարձրացման նախագիծը նոր չէ․ այն ընդունվել, ստորագրվել և ուժի մեջ է մտել մինչև ընտրություններն ու դրանց արդյունքների վիճարկման գործընթացը։