Գագիկ Ծառուկյանը ձերբակալվել է. Քննչական կոմիտեն և փաստաբանը մանրամասներ են հայտնում

«Բարգավաճ Հայաստան» կուսակցության ղեկավար Գագիկ Ծառուկյանին ձերբակալել են, նրան կալանավորելու միջնորդություն առաջիկայում կներկայացվի դատարան։ Այս մասին հուլիսի 6-ին լրագրողների հետ զրույցում հայտնել է նրա փաստաբան Երեմ Սարգսյանը։

Փաստաբանի խոսքով՝ Ծառուկյանին մեղադրանք է առաջադրվել խարդախության օժանդակության և փողերի լվացման օժանդակության հոդվածներով։ Նա պնդում է, որ այն գործով, որտեղ Ծառուկյանը կամ նրա հետ փոխկապակցված ընկերությունը պետք է ճանաչվեր տուժող, վերջինիս վերածել են մեղադրյալի։

Ըստ Սարգսյանի՝ քրեական գործը վերաբերում է հայ-իրանական համատեղ պալատի ստեղծմանը։ Սարգսյանի խոսքով՝ Գագիկ Ծառուկյանը նպաստել է հայ-իրանական տնտեսական համագործակցության զարգացմանը, պետական մակարդակով տրամադրվել են անհրաժեշտ թույլտվություններ, ստեղծվել են համապատասխան կազմակերպություններ և իրականացվել են զգալի ներդրումներ։ Նրա պնդմամբ, սակայն, հետագայում Իրանի որոշ քաղաքացիներ չարաշահումներ են կատարել, ինչի առնչությամբ նրանց նկատմամբ հարուցվել են քրեական վարույթներ։

Փաստաբանը նշել է, որ իրանական կողմում ներկայացված հաղորդումների հիման վրա հավաքված նյութերը փոխանցվել են հայ իրավապահներին, որոնք էլ դրանք հիմք են ընդունել քրեական հետապնդում իրականացնելու համար։

«Փոխարենը, որ նրա մասնակցությամբ կազմակերպությունը ճանաչվեր տուժող, որոշել են Գագիկ Ծառուկյանին դարձնել մեղադրյալ»,- ասել է փաստաբանը։

Նրա գնահատմամբ՝ Հայաստանի իշխանությունները տվյալ դեպքում չեն պաշտպանում սեփական քաղաքացու շահերը։

«Հայաստանի Հանրապետությունը, իր քաղաքացու շահերը պաշտպանելու փոխարեն, այս դեպքում գործում է նրա շահերի դեմ»։

Փաստաբանը նաև քաղաքական ենթատեքստ է տեսնում կատարվածում։

ՀՀ քննչական կոմիտեն ևս մանրամասներ է ներկայացրել, ըստ կոմիտեի՝ փաստական տվյալներ են ձեռք բերվել այն մասին, որ Գագիկ Ծառուկյանի կազմակերպմամբ մի շարք անձինք 2022-2024-ի ընթացքում առերևույթ կատարել են առանձնապես խոշոր չափերով խարդախություն և առանձնապես խոշոր չափերով փողերի լվացում:

«Մասնավորապես, ըստ քրեական վարույթում առկա տվյալների, Գ.Ծ.-ի կազմակերպմամբ և ղեկավարմամբ գործող հանցավոր խմբի անդամները Իրան-Հայաստան առևտրային կապերը զարգացնելու նպատակով ԻԻՀ քաղաքացի հանդիսացող անձանց հետ ձեռք են բերել համապատասխան պայմանավորվածություններ, որոնց շրջանակում հիմնել են նաև համատեղ իրավաբանական անձինք։ Այնուհետև, Իրան-Հայաստան լոգիստիկ բեռնափոխադրման կապ ստեղծելու քողի ներքո, գործելով խաբեության և վստահությունը չարաշահելու եղանակով ուրիշի գույքի առանձնապես խոշոր չափերով հափշտակություն կատարելու ուղղակի դիտավորությամբ՝ ԻԻՀ-ում ձեռնարկատեր հանդիսացող մի շարք անձանց կողմից ղեկավարվող և այնտեղ գործունեություն ծավալող ընկերություններից ձեռք են բերել և Հայաստանի Հանրապետություն են ներմուծել 52 միավոր տրանսպորտային միջոցներ, տեխնիկաներ, վառելիք և տարբեր տեսակի ապրանքներ, ապա ներկրումները քողարկելով տնտեսական գործունեություն ծավալելու ձևական դրսևորումներով, կեղծել են ներմուծման մաքսային հայտարարագրերը և պաշտոնական այլ փաստաթղթեր, նախապես առաջացած դիտավորությամբ հափշտակել են ընդհանուր 21 մլն 72 հզր 827 ԱՄՆ դոլարին համարժեք շուրջ 8 մլրդ 126 մլն 946 հզր 460 ՀՀ դրամ արժողության գույքերը։ 

Այնուհետև, հանցավոր խմբի անդամները նպատակ ունենալով օրինականացնել վերը նշված հանցավոր գործունեության արդյունքում ձեռք բերված գույքերը՝ դրանց հանցավոր ծագումը քողարկելու նպատակով, ապրանքների հափշտակությունից հետո ՀՀ ներմուծման փաստաթղթերը կեղծելու, դրանց մի մասը նաև կեղծ փաստաթղթերի հիման վրա օտարելու եղանակով քողարկել են խարդախությամբ հափշտակված տրանսպորտային միջոցների և մյուս ապրանքների հանցավոր ծագումը, փոխակերպել և վաճառքից առաջացած գումարները միախառնել են իրենց այլ եկամուտներին՝ թաքցնելով հանցավոր ճանապարհով ստացված գույքի և դրամական միջոցների իրական ծագման բնույթը՝ դրանց տալով օրինական տեսք:

Բացի այդ, Գ.Ծ.-ն հանդիսանալով ՀՀ-ում պետական գրանցում ստացած ՍՊ ընկերության իրական շահառու, վառելիքի ներկրմամբ և վաճառքով զբաղվող Ռ.Կ.-ի հետ գալով նախնական հանցավոր համաձայնության, կազմակերպել և ղեկավարել է վերջինիս կողմից վառելիքի ներկրման գործարքի շրջանակում ԻԻՀ քաղաքացի Յ.Ի.-ից խաբեությամբ առանձնապես խոշոր չափերով՝ 934 հզր 465 ԱՄՆ դոլար գումարի հափշտակությունը, որի արդյունքում առաջացած գումարները միախառնել է իր ղեկավարած ՍՊ ընկերության օրինական շրջանառությանը, այդպիսով քողարկելով և թաքցնելով հանցավոր ճանապարհով ստացված գույքի և դրամական միջոցների իրական ծագման բնույթը՝ դրանց տալով օրինական տեսք: 

Հանցանքների կատարումը վկայող փաստերի հիման վրա ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության քննիչի կողմից միջնորդություններ են ներկայացվել հսկող դատախազին Գ.Ծ.-ի նկատմամբ Քրեական օրենսգրքի 46-255-րդ հոդվածի 3-րդ մասի 3-րդ կետով (2 դրվագ) (առանձնապես խոշոր չափերով խարդախությունը կազմակերպելը), 46-296-րդ հոդվածի 3-րդ մասի 3-րդ կետով (2 դրվագ) (առանձնապես խոշոր չափերով փողերի լվացումը կազմակերպելը), հանցավոր խմբի անդամներից մեկի նկատմամբ՝ 255-րդ հոդվածի 3-րդ մասի 3-րդ կետով (2 դրվագ) և 296-րդ հոդվածի 3-րդ մասի 3-րդ կետով (2 դրվագ), հանցավոր խմբի մյուս անդամի նկատմամբ՝ 255-րդ հոդվածի 3-րդ մասի 3-րդ կետով և 296-րդ հոդվածի 3-րդ մասի 3-րդ կետով հանրային քրեական հետապնդում հարուցելու մասին, որոնք բավարարվել են։ 

Առանձնապես խոշոր չափերով խարադախության, առանձնապես խոշոր չափերով փողերի լվացման և առանձանապես խոշոր չափերով հարկեր չվճարելու դեպքերի առթիվ գլխավոր վարչությունում քննվող մեկ տասնյակից ավելի քրեական վարույթների նախաքննության շրջանակում ՀՀ ԱԱԾ, ՀՀ ՊԵԿ, ՀՀ ՆԳՆ ոստիկանության աշխատակիցների հետ համատեղ 70-ից ավելի հասցեներում իրականացվել են միաժամանակյա խուզարկություններ, որոնց արդյունքում հայտնաբերվել են քրեական վարույթի համար նշանակություն ունեցող փաստաթղթեր, առարկաներ, այդ թվում՝ հափշտակված տրանսպորատային միջոցները: 

Գ.Ծ.-ն և հանցավոր խմբի ևս մեկ անդամ ձերբակալվել են՝ դատարան ներկայացնելու նպատակով, հանցավոր խմբի մյուս անդամի վերաբերյալ կայացվել է ձերբակալման որոշում»,- նշված է ՔԿ-ի հաղորդագրության մեջ։