Նրանք խարդախ են. Թրամփն ասել է, որ Իրանի հետ բանակցելն իմաստ չունի

Միացյալ Նահանգների նախագահ Դոնալդ Թրամփը Իրանի հետ ստորագրված փոխըմբռնման հուշագիրն անվանել է «ավարտված», իսկ բանակցելը՝ «ժամանակի կորուստ». այս մասին նա ասել է Անկարայում հուլիսի 8-ին անցկացվող ՆԱՏՕ-ի գագաթնաժողովի ընթացքում։  

«Ըստ իս՝ [գործարքն] ավարտված է [it’s over]։ Ես չեմ ցանկանում նրանց հետ [Իրանի] գործ ունենալ, նրանք խարդախ (scam) են, հիվանդ մարդիկ են, կառավարվում են հիվանդ մարդկանց կողմից»,- ասել է Թրամփը ՆԱՏՕ գլխավոր քարտուղարի ներկայությամբ։

Թրամփը նշել է, որ նա այդպես է մտածում ի հեճուկս ամերիկյան կողմի բանակցողներ Սթիֆ Ուիթքոֆի և Ջարեդ Քուշների, որոնք ցանկանում են բանակցել։

«Ես կարծում եմ, որ նրանց հետ [Իրանի] գործ ունենալը ժամանակի կորուստ է, նրանք ստախոս են։ Մենք գործարքի ենք հասնում, բոլորը համաձայնում են՝ ոչ մի միջուկային զենք [ունենալու մասին]։ Նրանք հետո մամուլով հայտարարում են, թե այդ հարցը չեն էլ քննարկել։ Ինչ-որ բան այն չէ նրանց հետ։ Ըստ իս՝ գործարքն ավարտված է»,- հավելել է Թրամփը։

Հուլիսի 7-ի գիշերը ընդհարում է եղել Միացյալ Նահանգների ու Իրանի միջև։ Ամերիկյան կողմը հարվածել է Իրանի հարավային շրջաններին և չեղարկել Իրանին տրված այն թույլտվությունը, որը նախատեսում էր իրանական նավթի վաճառքն արտաքին շուկայում։ ԱՄՆ-ն Իրանին մեղադրում է ավելի վաղ Հորմուզի նեղուցում երեք նավթատար տանկեր թիրախավորելու մեջ։

Ամերիկյան հարվածներից հետո Իրանն իր հերթին թիրախավորել է արաբական մի շարք երկրներում տեղակայված ամերիկյան բազաները։

Միացյալ Նահանգներն ու Իրանը առցանց փոխըմբռնման հուշագիր ստորագրեցին հունիսի 17-ին ավելի քան երեք ամսից ձգված պատերազմից հետո։ Այն թերևս միակ երկկողմ ստորագրությունն է Իսլամական հեղափոխությունից հետո։

Հուշագիրը, որը կազմված է 14 կետից, նախատեսում է առավելագույնը 60 օրյա ժամկետում հասնել վերջնական համաձայնության, որը սակայն կարող է երկարաձգվել փոխադարձ համաձայնությամբ։ 

Հուշագրի կետերի մեծ մասը վերաբերում է բանակցային հիմնական թեմաների շուրջ սկզբունքային համաձայնությանը, այդ թվում՝ Իրանի միջուկային ծրագրին, Իրանի դեմ պատժամիջոցների չեղարկմանը։ Գործնական մասը վերաբերել է Հորմուզի նեղուցում նավերի ազատ տեղաշարժին։ Իրանն ու ԱՄՆ-ն այդ և մի շարք այլ կետեր տարբեր կերպ են մեկնաբանում։