Հաղթած համայնքներում «Ուժեղ Հայաստանը» կկատարի բնակարան նվիրելու խոստումը

«Ուժեղ Հայաստան» դաշինքը կիրականացնի հինգերորդ երեխան ունեցող ընտանիքներին բնակարան նվիրելու նախընտրական խոստումն այն համայնքներում, որտեղ հաղթանակ է տարել։ Այս մասին հայտարարել է դաշինքի առաջին համար Նարեկ Կարապետյանը։

Կարապետյանը հուլիսի 15-ին այցելել է Ստեփանավան, Գյուլագարակ համայնքներ, ինչպես նաև Ագարակ և Կուրթան գյուղեր, որտեղ կուսակցությունը ստացել է բնակիչների մեծամասնության աջակցությունը խորհդարանական ընտրություններում։

Նրա խոսքով՝ ծրագիրն առաջին փուլում կիրականացվի Ստեփանավանի, Գյուլագարակի և Տաշիրի տարածաշրջաններում։ Այդ համայնքներում հինգերորդ երեխայի ծնվելու դեպքում ընտանիքին կնվիրվի բնակարան՝ ձևակերպված մոր անունով։

Հունիսի 7-ի խորհրդարանական ընտրություններին անցողիկ շեմը հաղթահարել է երեք ուժ՝ «Քաղաքացիական պայմանագիր» կուսակցությունը, «Ուժեղ Հայաստան» դաշինքը, «Հայաստան» դաշինքը։ Ձայների չնչին տարբերությամբ 4% անցողիկ շեմը չհաղթահարեց «Բարգավաճ Հայաստան» կուսակցությունը։