Լուսինե Վարդանյան
Եվրոպական Միությունն իր ցավակցությունն է հայտնում Արսեն Գևորգյանի ընտանիքին։ Այս մասին ՍիվիլՆեթին հայտնեց Եվրահանձնաժողովի խոսնակ Քրիստիան Վիգանդը։
ԵՄ-ն նաև ակնկալում է, որ «Հայաստանը կկատարի Հայաստան-ԵՄ գործընկերության շրջանակում ստանձնած իր պարտավորությունները»։
«Այս դեպքը պահանջում է հանգամանալից, անկախ և թափանցիկ քննություն։ Մարդու իրավունքների պաշտպանությունը, իրավունքի գերակայության նկատմամբ հարգանքը և ժողովրդավարական հաստատությունների անկախությունը շարունակում են առանցքային տեղ զբաղեցնել Հայաստանի հետ ԵՄ գործընկերության մեջ»,- նշեց նա։
«Ուժեղ Հայաստան» կուսակցությունը նոյեմբերի 11-ին Երևանում ԵՄ պատվիրակության գրասենյակի առջև՝ «Արդարություն Արսեն Գևորգյանի համար» պահանջով ակցիա էր իրականացնում և պահանջում եվրոպական կառույցների արձագանքը։
Արսեն Գևորգյանը մահացել է նոյեմբերի 10-ին Նուբարաշենի կալանավայրում։ Նա «Ուժեղ Հայաստանի»՝ Ստեփանավան համայնքի ղեկավարի թեկնածուն էր, կալանավորվել էր ընտրակաշառքի գործով։
Գևորգյանը չէր ընդունում մեղադրանքը։ «Ուժեղ Հայաստան»-ը քրեական հետապնդումը որակել էր քաղաքական՝ այն կապելով Ստեփանավանի ընտրությունների հետ։ Գևորգյանի մեղավորությունը դատարանի օրինական ուժի մեջ մտած դատավճռով հաստատված չէր։
Գևորգյանի մահվան դեպքի առթիվ քրեական վարույթ է նախաձեռնվել։Արդարադատության նախարար Սրբուհի Գալյանը լրագրողների հետ զրույցում հայտնել էր, որ Գևորգյանը վաղ առավոտյան բողոքել է ինքնազգացողության վատթարացումից։ Նրան զննել է հերթապահ բուժակը, այնուհետև շտապօգնություն է կանչվել։ Նախարարի խոսքով՝ արձանագրվել է սրտի կանգ։
Գալյանը նաև հայտնել է, որ քրեակատարողական հիմնարկում գտնվելու ընթացքում Գևորգյանն առողջական խնդիրների մասին չի բարձրաձայնել։
Արսեն Գևորգյանի մահվան դեպքը հարցեր է բարձրացնում նաև կալանավայրերում բժշկական սպասարկման խնդիրների, քաղաքական գործերով կալանքի կիրառման և արդարադատության համակարգի այլ խնդիրների մասին։
Այս հարցերին է անդրադառնում փաստաբան Վարազդատ Հարությունյանը ՍիվիլՆեթի Գևորգ Թոսունյանի հետ զրույցում։
Մարդու իրավունքների պաշտպան Անահիտ Մանասյանի նախաձեռնությամբ դեպքի առնչությամբ ուսումնասիրություն է սկսվել։ ՄԻՊ-ի տարածած հայտարարության մեջ նշվում է, որ «պետությունը պարտավոր է ապահովել նաև մահվան դեպքերի առնչությամբ նախաձեռնված քրեական վարույթների բազմակողմանի, լրիվ և օբյեկտիվ քննությունը»։
Պատմություններ
