Սերժ Սարգսյանի նկատմամբ Սև բերդի օտարման գործով հետապնդում է հարուցվել

Քննչական կոմիտեն ավարտել է երրորդ նախագահ Սերժ Սարսգյանի նկատմամբ նախաձեռնված քրեական վարույթի նախաքննությունը, որը վերաբերում է Գյումրու Սև բերդ ամրոցի օտարմանը։

Ըստ ՔԿ-ի՝ 2005 թվականի մայիսի 11-ին պաշտպանության նախարար եղած ժամանակ Սերժ Սարգսյանը 22,951 մլն դրամով ֆիզիկական անձի է վաճառել հանրապետական նշանակության պատմամշակութային հուշարձան հանդիսացող Սև բերդ ամրոցը՝ 626,45 քառակուսի մետր մակերեսով, ինչպես նաև դրա օգտագործման համար նախատեսված 0,7 հեկտար հողամասը։

Քննչական կոմիտեի տվյալներով՝ ամրոցի վաճառքը չի համապատասխանել կառավարության որոշումներին։ Դրա հետևանքով, ըստ ՔԿ-ի, պետությունը կորցրել է Սև բերդի նկատմամբ սեփականության իրավունքը, իսկ հուշարձանը չի ընդգրկվել 2007 թվականին հաստատված՝ պետական սեփականություն համարվող և օտարման ոչ ենթակա պատմամշակութային հուշարձանների ցանկում։

Հսկող դատախազը Սերժ Սարգսյանի նկատմամբ հարուցել է հանրային քրեական հետապնդում՝ պաշտոնեական լիազորությունները չարաշահելու կամ անցնելու հոդվածով, որը, ըստ մեղադրանքի, անզգուշությամբ առաջացրել է ծանր հետևանքներ։