Նարեկ Կարապետյանը չի կալանավորվի․ փաստաբան
«Ուժեղ Հայաստան» դաշինքից ընտրված պատգամավոր Նարեկ Կարապետյանը չի կալանավորվի։ Կենտրոնական ընտրական հանձնաժողովը մերժել է Դատախազության միջնորդությունը, լրագրողներին հայտնեց փաստաբան Արամ Վարդևանյանը։
«Կենտրոնական ընտրական հանձնաժողովը վերադարձրել է Գլխավոր դատախազության միջնորդությունը, այսինքն խափանման միջոցի հարց՝ կալանքի կամ տնային կալանքի, տեղի չի ունենալու։
Ամենահավանական կանխատեսումն այն է, որ առաջիկայում Նարեկ Կարապետյանի նկատմամբ մի ապօրինի մեղադրանքի առաջադրման գործընթաց և ավելի նվազ խափանման միջոցի ընտրության գործընթաց, որի հնարավորություններն ունեն»,- ասաց Վարդևանյանը։
Մեկ այլ որոշմամբ ԿԸՀ-ն համաձայնություն է տվել մեղադրանք առաջադրել Նարեկ Կարապետյանի նկատմամբ։
Նարեկ Կարապետյանի նկատմամբ քրեական հետապնդում հարուցելու համար Գլխավոր դատախազությունը միջնորդություն էր ներկայացրել Կենտրոնական ընտրական հանձնաժողովին։
Հուլիսի 21-ին հաստատվել է Ազգային ժողովի հերթական ընտրությունների արդյունքներով ընտրված պատգամավորների գրանցման և մանդատների տրամադրման արձանագրությունը։ Գրանցվել ու մանդատ է ստացել նաև Նարեկ Կարապետյանը։
Մինչև նորընտիր Ազգային ժողովի լիազորությունների ստանձնումը՝ օգոստոսի 2-ի ժամը 10:00-ն, ընտրված պատգամավորների նկատմամբ քրեական հետապնդում հարուցելու կամ նրանց ազատությունից զրկելու համաձայնություն տալու իրավասությունը պատկանում է Կենտրոնական ընտրական հանձնաժողովին:
Օգոստոսի 2-ի ժամը 10:00-ից հետո, երբ մեկնարկի Ազգային ժողովի առաջին նիստը, անձեռնմխելիությունից զրկելու համար դատախազությունը պետք է դիմի արդեն խորհրդարանին:
Կազմակերպություն
Պատմություններ
