Ադրբեջանում ապօրինի է ճանաչվել իրանական երկու լրատվամիջոցի գործունեությունը

Իրանական «Սահար» հեռուստաալիքի և «Մեհր» լրատվական գործակալության, ինչպես նաև Ադրբեջանի տարածքում դրանց ներկայացուցիչների գործունեությունը համարվել է ապօրինի։ Ինչպես հայտնում է APA-ն, այս մասին ասված է Ադրբեջանի Մեդիայի զարգացման գործակալության տարածած հայտարարության մեջ։

«Հաշվի առնելով համապատասխան հոդվածի պահանջները և փոխադարձության սկզբունքը՝ «Սահար» հեռուստաալիքի, «Մեհր» լրատվական գործակալության, ինչպես նաև այդ ԶԼՄ-ների ներկայացուցիչների գործունեությունը Ադրբեջանի Հանրապետության տարածքում համարվում է ապօրինի, քանի որ դրանք գործում են Ադրբեջանի ազգային շահերին հակառակ և քարոզչություն են իրականացնում մեր երկրի ինքնիշխանության, սահմանադրական կարգի, տարածքային ամբողջականության ու ազգային անվտանգության դեմ»,- նշված է հայտարարության մեջ։