«Հայաստանը չէր ճանաչում Ղարաբաղը»․ Զախարովայի հայտարարությունն ու Բաքվի արձագանքը

Հավաքական անվտանգության պայմանագրի կազմակերպության (ՀԱՊԿ) մեխանիզմը չէր կարող գործարկվել Լեռնային Ղարաբաղի շուրջ հակամարտության ընթացքում, քանի որ Հայաստանն այդ տարածքը չէր ճանաչում ոչ որպես իր մաս, ոչ էլ որպես անկախ պետություն․ «Գվարդեյսկ» երիտասարդական ֆորումում հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան:

«Կար պատմություն Հայաստանի հետ, որը կարծես ասում էր. «եկեք գործարկենք ՀԱՊԿ մեխանիզմը»։ Իսկ ըստ էության՝ ում և ինչի՞ նկատմամբ։ Այն տարածքի՝ Լեռնային Ղարաբաղի, որը հենց ինքը՝ Հայաստանը, ցավոք, բարեբախտաբար՝ դա իմ հարցը չէ, դա իրենց՝ Երևանինն է, չէր ճանաչում ոչ իրենը, ոչ էլ անկախ»,- ասել է Զախարովան։

Արձագանքելով Մոսկվայի հայտարարությանը՝ Ադրբեջանի ԱԳՆ մամուլի ծառայության ղեկավար Այխան Հաջիզադեն պնդել է, թե Ռուսաստանի ԱԳՆ ներկայացուցչի խոսքերը «աղավաղում են իրականությունը»։

Բաքվի ներկայացուցչի խոսքով՝ «Ղարաբաղյան տարածաշրջանը միջազգային հանրության, այդ թվում՝ Ռուսաստանի Դաշնության կողմից միշտ ճանաչվել է Ադրբեջանի անբաժանելի մաս»։

Ըստ Հաջիզադեի՝ տարածքների նկատմամբ ՀԱՊԿ մեխանիզմների կիրառման հարցը օրակարգում պահելու փորձերը և դա Հայաստանի կողմից ճանաչման կամ չճանաչման հետ կապելը հակասում են Ռուսաստանի պաշտոնական դիրքորոշմանը և անհիմն են։