«Պարզ առաջադրանքների» խայծը․ ինչպես են օգտատերերից գումար պահանջում

Սոցցանցերում տարածվում են գովազդային գրառումներ, որոնցում առաջարկվում է հեռախոսի միջոցով պարզ առաջադրանքներ կատարելով եկամուտ ստանալ։

«Տանը՝ սուրճի կամ թեյի շուրջ, հեռախոսի էկրանին մի քանի պարզ առաջադրանք կատարելը կամ տեղեկատվություն համակարգելը հիանալի հնարավորություն է՝ օրվան նոր ռիթմ հաղորդելու և ընտանեկան բյուջեն համալրելու համար»,- նշված է գրառման մեջ։

Գովազդներին կցված է լուսանկար՝ «Դուք ստացել եք 10,000 դրամ կանխիկ միջոց։ Կարող եք ստանալ հենց հիմա» գրությամբ։

Սակայն իրականում սա խայծ է. օգտատերերը խոստացված եկամուտը ստանալու փոխարեն կարող են ֆինանսական կորուստներ կրել։ 

Կասկածելի կայք և կեղծ մեկնաբանություններ

Գրառման տեքստը, ամենայն հավանականությամբ, գեներացվել է արհեստական բանականության միջոցով․ այն անբնական է հնչում, իսկ նախադասությունները միմյանց հետ տրամաբանորեն չեն կապվում։ ԱԲ-ով ստեղծված բովանդակությունը հայտնաբերող գործիքները ևս բարձր հավանականությամբ այն գնահատում են որպես գեներացված տեքստ։ 

Գրառմանը կցված լուսանկարում ևս ակնհայտ են ԱԲ-ի հետքերը․ «Հենց հիմա»-ի փոխարեն գրվել է «հենծ իվա», իսկ ստորին հատվածում խեղաթյուրված են վճարային համակարգերի ու բանկերի անուններն ու տարբերանշանները։

Գրառումը ուղղորդում է պատահական տառերի համադրությամբ ստեղծված m1ccx[.]top կայք։ Այստեղ ևս նկատվում են մի շարք անհամապատասխանություններ։ Օրինակ՝ նույն լուսանկարն օգտագործվել է տարբեր անուններով հրապարակված մեկնաբանություններում, իսկ տղամարդու անուններով որոշ օգտատերերի լուսանկարներում կանայք են պատկերված։

Ո՞ւր է տանում կայքը

«Աշխատանքը» սկսելու համար նախ օգտատիրոջից պահանջում են կապ հաստատել WhatsApp-ով։ Այնտեղ մի քանի պարզ հարց են ուղղում, սակայն անկախ պատասխաններից՝ ուղարկում են am[.]cp-vip.food/register հղումը, ինչը կարող է վկայել, որ գործընթացն ավտոմատացված է։ Հղումով անցնելուց հետո օգտատիրոջից պահանջվում է գրանցվել կայքում և ուղարկել գրանցումը հաստատող էկրանապատկերը։ Այնուհետև նրան փոխանցում են տելեգրամյան օգտատիրոջ հղում և ուղղորդում հաղորդակցությունը շարունակել այնտեղ։

Anzhelika անունով տելեգրամյան օգտատերն իր հերթին ուղարկում է մեկ այլ ալիքի հղում՝ «Alibaba-ի աշխատանքային խումբ» անվանումով։ Ալիքը թեև ստեղծվել է մայիսի 28-ին, սակայն հուլիսի 29-ի դրությամբ արդեն ունի 30 723 հետևորդ։ 

Այնուհետև օգտատիրոջը տեղեկացնում են, թե կարող է միջնորդավճար ստանալ՝ պարզապես ընդունելով հաճախորդների պատվերները։ Դրա համար առաջարկում են կրկին այցելել am[.]cp-vip.food/register կայք և ակտիվացնել հաշիվը։

Սակայն ակտիվացման փորձի ժամանակ հայտնվում է հաղորդագրություն, որ պատվերների հասանելիությունն արգելափակված է, և անհրաժեշտ է կապ հաստատել «աշխատակցի» հետ։ Էկրանապատկերն ուղարկելուց հետո «աշխատակիցը» պահանջում է 2 000 դրամ ներդնել՝ պնդելով, թե միայն դրանից հետո հնարավոր կլինի սկսել պատվերներ կատարել և օրական վաստակել 50 000-100 000 դրամ։

Կայքի միջոցով գումար ներդնել նույնպես չի ստացվում․ փոխանցումը մշտապես մնում է «սպասման մեջ»։ Դրանից հետո «աշխատակիցը» ուղարկում է Մարինե Հարությունյան անունով անձի բանկային քարտի համարը և պահանջում գումարը փոխանցել անմիջապես այդ հաշվին։

Այսպիսով, սկզբում առաջարկվող պարզ աշխատանքը փաստացի վերածվում է նախնական վճարման պահանջի։ Օգտատիրոջը ներգրավում են հեշտ առաջադրանքների և արագ եկամտի խոստումով, սակայն աշխատանքի անցնելու համար նրանից պահանջում գումար փոխանցել անհատի բանկային քարտին։ Որևէ երաշխիք չկա, որ դրանից հետո նա կստանա առաջադրանքներ, կկարողանա վաստակել կամ վերադարձնել վճարած գումարը։