Ռուսական երկաթուղիների ղեկավար Օլեգ Բելոզերովը հայտարարել է, որ հայկական երկաթուղու վարձակալության համար հնարավոր վճար սահմանելու մասին տեղեկությունները ստացել են մամուլից, ինչը, ըստ նրա, ընկերությունում «զարմանքով և տարակուսանքով» են ընդունել։
Նա նշել է, որ Հայաստանի հյուսիսում Դեբեդ գետի ավերիչ վարարումից հետո երկաթուղու վերականգնման աշխատանքները ֆինանսավորվել են Ռուսաստանի Դաշնության պահուստային ֆոնդի միջոցներով։
ՏԱՍՍ-ին տված հարցազրույցում նա ասել է, որ «Ռուսական երկաթուղիները» (ՌԺԴ) ամբողջությամբ կատարում է Հայաստանի հետ կնքված կոնցեսիոն պայմանագրով ստանձնած պարտավորությունները։
Բելոզերովի խոսքով՝ կոնցեսիոն պայմանագրի շնորհիվ Հայաստանն ստացել է ժամանակակից երկաթուղային ենթակառուցվածք՝ առանց պետական բյուջեի վրա վերականգնման և պահպանման ծախսերի բեռ դնելու։
Տե՛ս նաև՝ Երկաթուղու հարցում եթե անհամաձայնություն կա, կգնանք Արբիտրաժային դատարան․ Փաշինյան
Նա նշել է, որ «Հարավկովկասյան երկաթուղուց» ՌԺԴ-ին երբևէ շահաբաժիններ չեն վճարվել, իսկ ստացված ամբողջ շահույթն ուղղվել է երկաթուղու զարգացմանը։
ՌԺԴ-ի ղեկավարի խոսքով՝ ընկերությունը մտադիր է շարունակել պահպանել կոնցեսիոն պայմանագրի պայմանները։ Միաժամանակ, եթե պայմանագրի պայմանները փոխվեն կամ այն դադարեցվի, ընկերությունն իրավունք ունի ակնկալել կատարված ներդրումների վերադարձ։
Բելոզերովը նաև ընդգծել է, որ «Հարավկովկասյան երկաթուղին» Հայաստանի խոշորագույն և կարևոր գործատուներից մեկն է։ Նրա ներկայացմամբ՝ 2008-2025-ին ՌԺԴ-ի և «Հարավկովկասյան երկաթուղու» սեփական եկամուտների հաշվին կատարված ներդրումների ընդհանուր ծավալը կազմել է շուրջ 396,3 մլն դոլար։
Պատմություններ
