Պետական համակարգում աշխատելու համար ստացվել է 1141 հայտ. 459 թեկնածու անցել է երկրորդ փուլ
Հայաստանի պետական կառավարման համակարգում աշխատելու նպատակով առաջատար համալսարանների շրջանավարտներից ստացվել է ընդհանուր 1141 հայտ: Այդ մասին իր ֆեյսբուքյան գրառմամբ հայտնել է ՀՀ վարչապետ Նիկոլ Փաշինյանը՝ ամփոփելով հունիսի կեսերին արված հրավերի արդյունքները։
Ըստ ներկայացված վիճակագրության՝ նախնական ընտրության արդյունքում 459 թեկնածու կամ դիմորդների շուրջ 40 տոկոսը անցել է երկրորդ փուլ։ Թեկնածուների միջին տարիքը 34 է։
Փաշինյանը կարծում է, որ նախաձեռնությունն արժանացել է մեծ հետաքրքրության: Հաջորդիվ հարցազրույցների և մասնագիտական գնահատման արդյունքների հիման վրա կձևավորվի կառավարության կադրային բանկ: Ընդգրկված թեկնածուների կրթությունը, աշխատանքային փորձն ու մասնագիտական հմտությունները կհամադրվեն պետական համակարգի կոնկրետ կարիքների հետ։
Փաշինյանը նաև հավելել է, որ ծրագրի շրջանակներում արդեն իսկ կան կոնկրետ որոշումներ նշանակումների վերաբերյալ։
«Պիտի արձանագրեմ, որ այսօր արդեն մի շարք դիմումատուների բարձր պաշտոններում նշանակելու որոշում եմ կայացրել, եւ առաջիկայում կտեսնեք այդ որոշումների դե յուրե իրագործումը»,- հայտնել է կառավարության ղեկավարը։
Կադրային բանկում ընդգրկված մյուս թեկնածուներին առաջիկա մեկ տարվա ընթացքում ևս կարող են առաջարկվել աշխատանքի հնարավորություններ պետական կառավարման համակարգում կամ համագործակցության այլ ձևաչափեր:
Պատմություններ
