Հոդվածի թարգմանությունը՝ OC Media-ի հետ համագործակցության շրջանակում։
Վրաստանի վարչապետ Իրակլի Կոբախիձեն հայտարարել է, որ Աբխազիան բենզին է ստացել վրացական ընկերություններից, որոնց անունները չեն նշվում։ Վառելիքի շարունակական պակասը կապվում է Ռուսաստանից բենզինի մատակարարումների խափանումների հետ, որոնք առաջացել են նավթավերամշակման գործարանների և էներգետիկ այլ օբյեկտների վրա ուկրաինական հարձակումների հետևանքով։ Թեև թե՛ վրացական, թե՛ աբխազական կողմերը հաստատել են մատակարարումների մասին տեղեկությունը, վրացական նավթային ընկերությունները հերքել են, որ իրենք են Աբխազիա վառելիք մատակարարել։
Չորեքշաբթի Կոբախիձեն ասել է, որ բենզինը մատակարարել է ոչ թե կառավարությունը, այլ վրացական մասնավոր ընկերությունները։
Նա հավելել է, որ եթե Աբխազիայում բնակվող վրացիների կամ աբխազների վիճակը թեթևացնելու հնարավորություն լինի, կառավարությունը դա կանի Վրաստանի օրենսդրության շրջանակում։
«Եթե կարողանանք, ի թիվս այլոց, թեթևացնել Աբխազիայում բնակվող բնակչության վիճակը, դա ևս կանենք, բայց կգործենք «Օկուպացված տարածքների մասին» օրենքի շրջանակում»,- ասել է Կոբախիձեն՝ հավելելով, որ բոլոր «նման քայլերը կձեռնարկվեն» օրենքի շրջանակում։
Օրենքն ընդհանուր առմամբ արգելում է տնտեսական գործունեությունն Աբխազիայում և Հարավային Օսիայում, սակայն Թբիլիսիի համաձայնությամբ բացառություններ է թույլ տալիս, եթե այդ գործունեությունը բխում է Վրաստանի պետական շահերից, նպաստում է հակամարտության խաղաղ կարգավորմանը, պատերազմի հետևանքով տուժած մարդկանց միջև վստահության վերականգնմանը կամ մարդասիրական նպատակներ է հետապնդում։
Նավթամթերք ներմուծողների միության նախագահ Վախթանգ Իոբաշվիլին օգոստոսի 13-ին TV Pirveli-ին ասել է, որ իր հետ կապ հաստատած նավթային ընկերություններից ոչ մեկը չի հաստատել Աբխազիա բենզին մատակարարելու մասին տեղեկությունը։
Իոբաշվիլին չի բացառել, որ բենզինը Վրաստանի վերահսկողության տակ գտնվող տարածքից կարող էր մատակարարել որևէ օտարերկրյա ընկերություն։
Միևնույն ժամանակ, Սուխումի իշխանությունները հայտարարել են, որ Աբխազիան շարունակում է էներգակիրներ ստանալ Ռուսաստանից, սակայն բենզինի պակասի պատճառով սկսել են դիտարկել «այլընտրանքային աղբյուրներից» մատակարարումների հնարավորությունը։
«Արտաքին գործոններով պայմանավորված իրավիճակի պատճառով բենզինը չի բավարարում Աբխազիայի Հանրապետության կարիքները»,- ասվում է հայտարարության մեջ։
«Այս կապակցությամբ որոշում է կայացվել դիտարկել այլընտրանքային աղբյուրներից բենզինի հնարավոր մատակարարումը։ Բենզինի շուկայի մասնակիցներին հաջողվել է Վրաստանից բենզին մատակարարելու ճանապարհ գտնել»,- նշվում է հայտարարության մեջ։
Հայտարարության մեջ նաև նշվում է, որ 1992-1993-ին աբխազական պատերազմից հետո Թբիլիսիի և Սուխումի միջև նախկինում ևս բենզինի փոխանակում է եղել։
Ինգուրի կամուրջը՝ Աբխազիան Վրաստանի վերահսկողության տակ գտնվող տարածքի հետ կապող միակ անցակետը, երեքշաբթի առավոտյան մոտ երկու ժամով փակվել է երկու ուղղություններով։ Տեղի բնակիչները OC Media-ին հայտնել են, որ այդ ընթացքում բենզին պետք է տեղափոխվեր Աբխազիա։
Գալիի բնակիչների խոսքով՝ մեկ լիտր բենզինն այժմ արժե 130-140 ռուբլի (1,60-1,80 դոլար), մինչդեռ նախկինում այն արժեր 80-95 ռուբլի (1-1,20 դոլար)։
Բենզինի մատակարարումները արժանացել են վրացի ընդդիմադիր քաղաքական գործիչների քննադատությանը։
Ընդդիմադիր «Կոալիցիա հանուն փոփոխությունների» դաշինքի առաջնորդ Նիկա Գվարամիան հայտարարել է, որ հաշվի առնելով Վրաստանի անվտանգության և տարածքային շահերը, ինչպես նաև Ռուսաստանի դեմ արևմտյան պատժամիջոցները՝ Ռուսաստանի վերահսկողության տակ գտնվող տարածք բենզինի մատակարարումը չի կարող արդարացվել օրենքով թույլատրված մարդասիրական կամ սոցիալ-տնտեսական հիմքերով։
Ընդդիմադիր քաղաքական գործիչ և Ազգային բանկի նախկին նախագահ Ռոման Գոցիրիձեն ևս հայտարարել է, որ այդ քայլը հավասարազոր է ռուսական ռազմաբազաներին վառելիք մատակարարելուն։
Գոցիրիձեն կոչ է արել հրապարակել մատակարարումն իրականացրած ընկերության անունը, ինչպես նաև տեղեկություններ, թե որքան բենզին է մատակարարվել և արդյոք այն օգտագործվել է ռուսական ուժերի կողմից։
«Պետք է անհապաղ հայտնի դառնա, թե որ ընկերությունը որքան բենզին է ներմուծել Աբխազիա և արդյոք այն օգտագործել են ռուսական օկուպացիոն ուժերը», - Ֆեյսբուքում գրել է Գոցիրիձեն՝ հավելելով, որ մատակարարումն իրականացրած ընկերությունը կարող է հայտնվել պատժամիջոցների տակ։
Վերջին տարիներին Աբխազիան պարբերաբար բախվում է բենզինի պակասի, իսկ տեղի վառելիքի շուկան մեծապես կախված է Ռուսաստանից մատակարարումներից։ Վերջին շրջանում պակասը կրկին զգալի է դարձել․ տեղական իշխանություններն ու գործարարները հայտնում են մատակարարումների ապահովման դժվարությունների և բենզինի գների աճի մասին։ Վառելիքի ներկայիս պակասը կապվում է Ռուսաստանից բենզինի մատակարարումների խափանումների հետ, որոնք առաջացել են նավթավերամշակման գործարանների և էներգետիկ այլ օբյեկտների վրա ուկրաինական հարձակումների հետևանքով։
OC Media-ն չի օգտագործում «դե ֆակտո», «չճանաչված» կամ «մասնակի ճանաչված» ձևակերպումները Աբխազիայի և Հարավային Օսիայի հաստատությունների կամ քաղաքական պաշտոնների մասին խոսելիս։ Սա դրանց կարգավիճակի մասին դիրքորոշում չէ և արվում է ընթերցումը հեշտացնելու նպատակով։
Պատմություններ
