Օգոստոսի 14-ին Կիև կատարած աշխատանքային այցի շրջանակներում ՀՀ ԱԳ նախարարի տեղակալի ժամանակավոր պաշտոնակատար Վահան Կոստանյանը հանդիպել է Ուկրաինայի Գերագույն ռադայի նախագահի տեղակալ Օլենա Կոնդրատյուկի հետ, հայտնում են ԱԳՆ-ից:
Զրուցակիցներն անդրադարձել են Հայաստան-Ուկրաինա հարաբերությունների զարգացման հեռանկարներին, ընդգծել համատեղ ջանքերով վերջին շրջանում ակտիվացած բարձրաստիճան շփումների հետագա ընդլայնման և երկկողմ օրակարգի առավել ամրապնդման անհրաժեշտությունը:
Կարևորելով միջխորհրդարանական համագործակցության դերը երկկողմ հարաբերությունների առաջմղման գործում՝ Վահան Կոստանյանը և Օլենա Կոնդրատյուկն ընդգծել են երկու երկրների խորհրդարանների միջև կապերի առավել սերտացման, ինչպես նաև բազմակողմ խորհրդարանական հարթակներում համագործակցության խորացման կարևորությունը:
Մտքեր են նաև փոխանակել տարածաշրջանային և միջազգային կարևորության հարցերի շուրջ։ Ընդգծվել է կայուն և տևական խաղաղության առաջմղման կարևորությունը:
Վերջին օրերին ակտիվացել են Հայաստանի և Ուկրաինայի պաշտոնյաների շփումները: Նախօրեին վարչապետ Նիկոլ Փաշինյանը հեռախոսազրույց էր ունեցել Ուկրաինայի նախագահի հետ: Զելենսկին շնորհավորել էր Նիկոլ Փաշինյանին՝ վարչապետի պաշտոնում վերանշանակվելու առիթով։
Ուկրաինայի Գերագույն ռադայի նախագահ Ռուսլան Ստեֆանչուկն էլ ԱԺ նախագահ Ռուբեն Ռուբինյանի հետ էր հեռախոսազրույց ունեցել՝ շնորհավորել խորհրդարանի նախագահ ընտրվելու կապակցությամբ:
Պատմություններ
